ಬೆಂಗಳೂರು : ಇಂದು ಬೆಳಿಗ್ಗೆ ಮುಖ್ಯಮಂತ್ರಿ ಸಿದ್ದರಾಮಯ್ಯನವರ ಮನೆಯಲ್ಲಿ ಉಪಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಬ್ರೇಕ್ ಫಾಸ್ಟ್ ಮಾಡುವ ಮೂಲಕ ಕುರ್ಚಿ ಕದನಕ್ಕೆ ಸಧ್ಯಕ್ಕೆ ಬ್ರೇಕ್ ಬಿದ್ದಿದೆ ಎಂದು ಹೇಳಲಾಗುತ್ತಿದೆ?
ಸಿದ್ದರಾಮಯ್ಯ ಮುಖ್ಯಮಂತ್ರಿಯಾಗಿ ಎರಡೂವರೆ ವರ್ಷ ಪೂರೈಸಿದ ನಂತರ ಮುಖ್ಯಮಂತ್ರಿ ಸ್ಥಾನವನ್ನು ಡಿ.ಕೆ,ಶಿವಕುಮಾರ್ ಅವರಿಗೆ ಬಿಟ್ಟು ಕೊಡಬೇಕೆಂಬ ಕೂಗು ಎದ್ದು, ಒಕ್ಕಲಿಗ ಸ್ವಾಮಿಗಳೂ ಸಹ ಡಿ.ಕೆ.ಶಿವಕುಮಾರ್ ಪರ ನಿಂತಿದ್ದರು.
ಕಳೆದ ಎರಡು ತಿಂಗಳಿಂದ ಕುರ್ಚಿ ಗುದ್ದಾಟ ದಿನದಿಂದ ದಿನಕ್ಕೆ ಒಂದಲ್ಲ ಒಂದು ರೀತಿಯಲ್ಲಿ ತಾರಕಕ್ಕೆ ಏರಿದ ಕಾರಣ ಕಾಂಗ್ರೆಸ್ ಹೈಕಮಾಂಡ್ ಇಬ್ಬರೂ ಕೂತು ಮಾತನಾಡಿಕೊಂಡು ನಮ್ಮ ಬಳಿಗೆ ಬನ್ನಿ ಎಂಬ ಸಂದೇಶವನ್ನು ರವಾನಿಸಿದ ಹಿನ್ನಲೆಯಲ್ಲಿ ಇಂದು ಮುಖ್ಯಮಂತ್ರಿ ಸಿದ್ದರಾಮಯ್ಯನವರ ನಿವಾಸದಲ್ಲಿ ಡಿ.ಕೆ.ಶಿವಕುಮಾರ್ ಅವರಿಗೆ ಬೆಳಗಿನ ಬ್ರೇಕ್ ಫಾಸ್ಟ್ ಏರ್ಪಡಿಸಲಾಗಿತ್ತು.
ಬ್ರೇಕ್ ಫಾಸ್ಟ್‍ಗೆ ಬಂದ ಉಪಮುಖ್ಯಮಂತ್ರಿ ಡಿ.ಕೆ.ಶಿವಕುಮರ್ ಅವರನ್ನು ನಗುಮುಖದಿಂದಲೇ ಬರಮಾಡಿಕೊಂಡ ಮುಖ್ಯಮಂತ್ರಿ ಸಿದ್ದರಾಮಯ್ಯ ಕುಶಲೋಪರಿಯ ನಂತರ ರಾಜಕೀಯದತ್ತ ಮಾತು ಹೊರಳಿತು ಎನ್ನಲಾಗಿದೆ.
2026ರ ಬಜೆಟ್ ಮಂಡಿಸುವ ತನಕ ನನಗೆ ಅವಕಾಶ ಮಾಡಿ ಕೊಡಿ, ಆ ವೇಳೆಗೆ ದೇವರಾಜು ಅರಸು ಮುಖ್ಯಮಂತ್ರಿಯಗಿದ್ದ ಕಾಲವನ್ನು ಸರಿಗಟ್ಟಿ ಹೆಚ್ಚು ಅವಧಿಗೆ ಮುಖ್ಯಮಂತ್ರಿಯಾದ ಒಂದು ದಾಖಲೆ ಸರಿಗಟ್ಟಲಿದ್ದೇನೆ ಇದಕ್ಕೆ ಸಹಕರಿಸಿ ಎಂದು ಸಿದ್ದರಾಮಯ್ಯ ಡಿ.ಕೆ.ಶಿವಕುಮಾರ್ ಅವರಿಗೆ ತಿಳಿಸಿ, ನಂತರ ನಾನೇ ನಿಮಗೆ ಗೌರವ ಹಿತವಾಗಿ ಮುಖ್ಯಮಂತ್ರಿ ಸ್ಥಾನ ಬಿಟ್ಟು ಕೊಡುವುದಾಗಿ ಸಿದ್ದರಾಮಯ್ಯ ಡಿ.ಕೆ.ಶಿವಕುಮಾರ ಅವರಿಗೆ ತಿಳಿಸಿದರೆನ್ನಲಾಗಿದೆ.
ಈ ಮಾತನ್ನು ಖಂಡಿತವಾಗಿ ನಡೆಸಿ ಕೊಡುವಿರಾ? ಎಂದು ಡಿ.ಕೆ.ಶಿವಕುಮಾರ್ ಅವರು ಮುಖ್ಯಮಂತ್ರಿ ಸಿದ್ದರಾಮಯ್ಯನವರಿಗೆ ಪ್ರಶ್ನಿಸಿದರೆನ್ನಲಾಗಿ, ಖಂಡಿತ ನಡೆಸಿ ಕೊಡುವುದಾಗಿ ಸಿದ್ದರಾಮಯ್ಯ ತಿಳಿಸಿದರೆನ್ನಲಾಗಿದೆ.
ಇದೇ ವಿಷಯವನ್ನು ಹೈಕಮಾಂಡ್ ಹತ್ತಿರ ಇಬ್ಬರೂ ಒಪ್ಪಿರುವುದಾಗಿ ತಿಳಿಸಲು ಪರಸ್ಪರ ಒಪ್ಪಿದ್ದಾರೆನ್ನಲಾಗಿದ್ದು, ಮಾರ್ಚಿಯಲ್ಲಿ ಡಿ.ಕೆ.ಶಿವಕುಮಾರ್ ಅವರು ಮುಖ್ಯಮಂತ್ರಿಯಾಗಲು ನನ್ನ ಸಹಮತವಿರುತ್ತದೆ ಎಂಬುದನ್ನು ಹೈಕಮಾಂಡ್ ಬಳಿ ಸಿದ್ದರಾಮಯ್ಯ ಹೇಳುತ್ತಾರೆನ್ನಲಾಗಿದೆ.
ಈ ಇಬ್ಬರೂ ನವೆಂಬರ್ 30ರಂದು ದೆಹಲಿಯಲ್ಲಿ ಹೈಕಮಾಂಡ್ ನ್ನು ಭೇಟಿಯಾಗಿ ಈ ವಿಷಯವನ್ನು ತಿಳಿಸುತ್ತಾರೆ ಎನ್ನಲಾಗಿದೆ.
ಇದರಿಂದ ಕುರ್ಚಿ ಕದನಕ್ಕೆ ಬ್ರೇಕ್ ಬೀಳಲಿದೆ ಎನ್ನಲಗುತ್ತಿದ್ದು, ಸಧ್ಯಕ್ಕೆ ಸಿದ್ದರಾಮಯ್ಯ ಸೇಫ್ ಎಂದು ಹೇಳಲಾಗುತ್ತಿದೆ.
ಬ್ರೇಕ್ ಫಾಸ್ಟ್ ನಂತರ ಮಾತನಾಡಿದ ಉಪಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಪಕ್ಷದ ವರಿಷ್ಠರು ಏನು ಹೇಳುತ್ತಾರೆ ಅದರಂತೆ ನಡೆದುಕೊಳ್ಳುತ್ತೇವೆ. ಕಾಂಗ್ರೆಸ್ನಲ್ಲಿ ಯಾವುದೇ ಗುಂಪು ಇಲ್ಲ. ಯಾವುದೇ ಗುಂಪುಗಾರಿಕೆ ಮಾಡುವ ಅವಶ್ಯಕತೆಯೂ ಇಲ್ಲ. ನಮ್ಮದು ಒಂದೇ ಒಂದು ಗುಂಪು ಅದು ಕಾಂಗ್ರಸ್ ಗುಂಪು. ನಾವು ಒಟ್ಟಿಗೆ ಹೋಗುತ್ತೇವೆ” ಎಂದು ಉಪಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಸ್ಪಷ್ಟಪಡಿಸಿದರು.
ಕಾಂಗ್ರೆಸ್ ಪಕ್ಷ ಜನರಿಗೆ ಕೊಟ್ಟ ಮಾತಿನಂತೆ ರಾಜ್ಯದಲ್ಲಿ ನಡೆದುಕೊಂಡಿದೆ. ಮುಂದೆಯೂ ನಡೆದುಕೊಳ್ಳುತ್ತದೆ. 2028ಕ್ಕೆ ಕಾಂಗ್ರೆಸ್ ಪಕ್ಷವನ್ನು ಅಧಿಕಾರಕ್ಕೆ ತರುತ್ತೇವೆ. ಆ ನಿಟ್ಟಿನಲ್ಲಿ ಕೆಲಸ ಮಾಡಿಕೊಂಡು ಹೋಗುತ್ತೇವೆ, ಬೆಳಗಾವಿ ಅಧಿವೇಶನದಲ್ಲಿ ವಿರೋಧ ಪಕ್ಷದ ನಾಯಕರನ್ನು ಎದುರಿಸಲು ಪ್ರತಿತಂತ್ರ ರೂಪಿಸಿದ್ದೇವೆ ಎಂದರು.
ಬ್ರೇಕ್ ಫಾಸ್ಟ್ ನಂತರ ಮುಖ್ಯಮಂತ್ರಿ ಹೇಳಿಕೆ :
ನಾನು, ಡಿಕೆ ಶಿವಕುಮಾರ್ ಮತ್ತು ಪೊನ್ನಣ್ಣನವರು ಬ್ರೇಕ್ ಫಾಸ್ಟ್ ಒಟ್ಟಿಗೇ ಮಾಡಿದ್ವು. ಡಿಕೆ ಶಿವಕುಮಾರ್ ಅವರು ಇವತ್ತು ನಮ್ಮ ಮನೆಗೆ ಬಂದಿದ್ರು. ಬ್ರೇಕ್ ಫಾಸ್ಟ್ ಒಟ್ಟಿಗೇ ಮಾಡಿದ್ದೀವಿ. ಯಾಕೆ ಅಂದರೆ ಹೈಕಮಾಂಡ್ ನವರು ವೇಣುಗೋಪಾಲ್ ಅವರು ಮೊನ್ನೆಯೇ ಫೋನ್ ಮಾಡಿ ಡಿ.ಕೆ.ಶಿವಕುಮಾರ್ ಅವರನ್ನು ಬ್ರೇಕ್ ಫಾಸ್ಟ್ ಗೆ ಕರೆ ಮಾಡಿ ಎಂದಿದ್ರು. ಆಗ ಡಿ.ಕೆ.ಶಿವಕುಮಾರ್ ನಮ್ಮ ಮನೆಗೆ ಊಟಕ್ಕೆ ಬನ್ನಿ ಎಂದು ಕರೆದರು. ಆದರೆ ಇಲ್ಲ ನನಗೆ ಹೈಕಮಾಂಡ್ ನವರು ಹೇಳಿದ್ದಾರೆ ಬ್ರೇಕ್ ಫಾಸ್ಟ್ ಗೆ ಕರೀರಿ ಎಂದಿದ್ರು. ಅದಕ್ಕೆ ಇನ್ನೊಂದು ದಿನ ಊಟಕ್ಕೆ ನಿಮ್ಮ ಮನೆಗೆ ಬರ್ತೀನಿ ಎಂದೆ.
ಉಭಯ ಕುಶಲೋಪರಿ ಆದ ಮೇಲೆ ಬಹಳ ಮುಖ್ಯವಾಗಿ ನಾವು ಈವತ್ತು ಭೇಟಿ ಮಾಡಿದ ಉದ್ದೇಶ ಅನಗತ್ಯವಾಗಿ ಕೆಲವು ಗೊಂದಲಗಳು ನಿರ್ಮಾಣವಾಗಿದೆ. ನಾವು ಇಬ್ರೇ ಕೂತುಕೊಂಡು ಮಾತಾಡಿದೆವು. ನಮ್ಮ ಉದ್ದೇಶ 28 ರ ಚುನಾವಣೆ ಬಹಳ ಮುಖ್ಯ. ಸ್ಥಳೀಯ ಸಂಸ್ಥೆಗಳ ಚುನಾವಣೆ ಬಹಳ ಮುಖ್ಯ. ಅದರ ಬಗ್ಗೆ ಚರ್ಚೆ ಮಾಡಿದೆವು. 28 ರ ಚುನಾವಣೆಯಲ್ಲೂ ಕಾಂಗ್ರೆಸ್ ನ ಅಧಿಕಾರಕ್ಕೆ ತರಬೇಕು ಎಂದು ತೀರ್ಮಾನ ಮಾಡಿದೆವು. ನಾವಿಬ್ರೂ ಕಳೆದ ವಿಧಾನಸಭೆ ಚುನಾವಣೆಯಲ್ಲಿ ಒಟ್ಟಿಗೇ ಕೆಲಸ ಮಾಡಿದೆವೋ ಅದೇ ರೀತಿ ಮುಂದೆಯೂ ಒಟ್ಟಿಗೇ ಹೋಗುವ ತೀರ್ಮಾನ ಮಾಡಿದೆವು. ನನಗೂ ಡಿಕೆ ಶಿವಕುಮಾರ್ ಗೂ ಯಾವುದೇ ಭಿನ್ನಾಭಿಪ್ರಾಯಗಳಿಲ್ಲ. ಮುಂದೆಯೂ ಇರಲ್ಲ. 8 ನೇ ತಾರೀಖಿನಿಂದ ಬೆಳಗಾವಿಯಲ್ಲಿ ಚಳಿಗಾಲದ ಅಧಿವೇಶನ ಆರಂಭವಾಗುತ್ತದೆ. ಅಲ್ಲಿ ನಾವು ವಿರೋಧ ಪಕ್ಷವನ್ನು ಇದುವರೆಗೆ ಎದುರಿಸಿದ್ದೇವೆ, ಮುಂದೆನೂ ಎದುರಿಸುತ್ತೇವೆ. ಸುಳ್ಳು, ಅಪಪಪ್ರಚಾರಗಳನ್ನು, ಆರೋಪಗಳನ್ನು ಮಾಡುವುದು ಬಿಜೆಪಿ, ಜೆಡಿಎಸ್ ನವರ ಚಾಳಿ.
ಇವರಿಬ್ಬರನ್ನೂ ಕೂಡಾ ಸಮರ್ಥವಾಗಿ ಸರ್ಕಾರ ಎದುರಿಸುತ್ತದೆ. ನಾನು, ಡಿಸಿಎಂ ಇಬ್ರೂ ಕೂಡಾ ಸಮರ್ಥವಾಗಿ ಎದುರಿಸುತ್ತೇವೆ. ಅದಕ್ಕೆ ಬೇಕಾದ ಸ್ಟ್ರಾಟಜಿ ಏನು ಮಾಡಬೇಕು ಎಂದು ಮಾತನಾಡಿದ್ದೇವೆ. ಯಾಕೆಂದರೆ ಅವರು ಪತ್ರಿಕಗಳೆಲ್ಲೆಲ್ಲಾ ಅವಿಶ್ವಾಸಗೊತ್ತುವಳಿ ಮಂಡಿಸುತ್ತೇವೆ ಎನ್ನುತ್ತಿದ್ದಾರೆ. ಆದರೆ ಅದೆಲ್ಲಾ ಸಾಧ್ಯವೇ ಇಲ್ಲ. ಯಾಕೆಂದರೆ ನಾವು140 ಜನ ಇದ್ದೀವಿ, ಅವರು ಎರಡು ಪಾರ್ಟಿ ಸೇರಿದಂತೆ 80 ಕ್ಕಿಂತ ಜಾಸ್ತಿ ಆಗಲ್ಲ. ನಾವಿಬ್ಬರೂ ಹೈಕಮಾಂಡ್ ನವರು ಏನು ಹೇಳ್ತಾರೆ ಹಾಗೆ ಕೇಳಬೇಕು ಎಂದು ಮುಖ್ಯವಾಗಿ ತೀರ್ಮಾನ ಮಾಡಿದ್ದೇವೆ. ಹೈಕಮಾಂಡ್ ನವರು ಬಹುಶಃ ಅಸೆಂಬ್ಲಿ ಇರೋದರಿಂದ ನಮಗೆ ಇಬ್ಬರಿಗೂ ಕೂಡಾ ಗೊಂದಲಗಳನ್ನು ಸರಿಮಾಡುವ ಕೆಲಸ ಮಾಡಿ ಎಂದಿದ್ದಾರೆ. ನಾಳೆಯಿಂದ ಯಾವುದೇ ಗೊಂದಲ ಇರಲ್ಲ ಎಂದು ಈ ಮೂಲಕ ಹೇಳುತ್ತೇನೆ’ ಎಂದಿದ್ದಾರೆ.
ಕೆಲವು ಮಾಧ್ಯಮ ವರದಿಗಳು ಗೊಂದಲಗಳನ್ನು ಉಂಟು ಮಾಡಿದೆ. ನೀವು ಗೊಂದಲ ಉಂಟು ಮಾಡದೇ ಇರದಿದ್ದರೆ ಏನೂ ಆಗಲ್ಲ. ಕೆಲವು ಶಾಸಕರು ದೆಹಲಿಗೆ ಹೋಗಿದ್ದಾರೆ ಇಲ್ಲ ಅನ್ನಲ್ಲ. ಅವರು ಸಚಿವ ಸಂಪುಟ ಪುನರಾರಚನೆ ಮಾಡ್ತೀನಿ ಎಂದು ನಾನು ಹೇಳಿದ್ದಕ್ಕೆ ಮಂತ್ರಿ ಮಾಡಿ ಎಂದು ಹೈಕಮಾಂಡ್ ಗೆ ಕೇಳುವುದಕ್ಕೆ ಹೋಗಿರಬಹುದು. ಅವರು ಯಾರೂ ನಾಯಕತ್ವದ ವಿರುದ್ಧವಿಲ್ಲ. ಕೆಲವರೆಲ್ಲಾ ಯಾಕೆ ಹೋಗಿದ್ವಿ ಎಂದು ನನ್ನ ಜೊತೆಗೇ ಮಾತನಾಡಿದ್ದಾರೆ. ಒಟ್ಟಾರೆಯಾಗಿ ನಾವು ಹೈಕಮಾಂಡ್ ಏನು ತೀರ್ಮಾನ ಕೊಡ್ತದೆ ಆ ರೀತಿಯಾಗಿ ಮಾಡಿಕೊಂಡು ಹೋಗುತ್ತೇವೆ. ಇದನ್ನು ನಾವು ಇಬ್ಬರೂ ತೀರ್ಮಾನಿಸಿದ್ದೇವೆ’ ಎಂದು ಸಿಎಂ ಸ್ಪಷ್ಟನೆ ನೀಡಿದ್ದಾರೆ.