ತುಮಕೂರು : ಹೆಣ್ಣು ಮಕ್ಕಳು ಓದಿಯೇ ಇಲ್ಲ ಅಂದರೆ ಉದ್ಯೋಗ ಎಲ್ಲಿಯದು? ಎಲ್ಲ ಹೆಣ್ಣು ಮಕ್ಕಳು ಶಾಲೆ ಬಿಟ್ಟು ಕೂಲಿನಾಲಿ ಮಾಡಿಕೊಂಡಿರುವುದನ್ನು ನಾವು ಕಾಣುತ್ತೇವೆ. ಹೆಣ್ಣು ಮಕ್ಕಳಿಗೆ ಆರೋಗ್ಯವೇ ಸರಿ ಇರುವುದಿಲ್ಲ. ತಾಯ್ತನದ ಮರಣ ಸಂಖ್ಯೆ ಹೆಚ್ಚಾಗಿದೆ. ಶಿಶು ಹತ್ಯೆ ಜಾಸ್ತಿ ಆಗಿದೆ ಎಂದು ಲೇಖಕಿ ದು.ಸರಸ್ವತಿ ಕಳವಳ ವ್ಯಕ್ತಪಡಿಸಿದರು.
ಕರ್ನಾಟಕ ಲೇಖಕಿಯರ ಸಂಘದ ತುಮಕೂರು ಜಿಲ್ಲಾ ಶಾಖೆ ಮತ್ತು ಸರ್ಕಾರಿ ಪಾಲಿಟೆಕ್ನಿಕ್ ವತಿಯಿಂದ ಮಾರ್ಚ್ 20ರಂದು ನಡೆದ ಅಂತಾರಾಷ್ಟ್ರೀಯ ಮಹಿಳಾ ದಿನಾಚರಣೆ ಸಮಾರಂಭ ಉದ್ಘಾಟಿಸಿ ಅವರು ಮಾತನಾಡಿದರು.
ಎಸ್ಎಸ್ಎಲ್.ಸಿ ವರೆಗೂ ಹೆಣ್ಣು ಮಕ್ಕಳೇ ಮುಂದೆ ಇರುತ್ತಾರೆ. ಆಮೇಲೆ ಅವರು ಎಲ್ಲಿ ಹೋಗುತ್ತಾರೋ ತಿಳಿಯುವುದಿಲ್ಲ. ಹೀಗಾಗಿ ಮಹಿಳೆ ಶಿಕ್ಷಣದಲ್ಲಿ ಹಿಂದೆ ಬಿದ್ದಿದ್ದಾರೆ, ಹೆಣ್ಣು ಮಕ್ಕಳ ಮೇಲೆ ಹಿಂಸೆ, ದೌರ್ಜನ್ಯ ಯಥೇಚ್ಚವಾಗಿ ನಡೆಯುತ್ತಿದೆ. ಮಾನವ ಅಭಿವೃದ್ಧಿ ಸೂಚ್ಯಂಕದಲ್ಲಿ ಮಹಿಳೆಯರ ಮೇಲಿನ ಹಿಂಸೆ, ದೌರ್ಜನ್ಯದಲ್ಲಿ ಮೇಲಿನ ಸ್ಥಾನದಲ್ಲಿದ್ದೇವೆ. 75 ರಿಂದ 85ರವರೆಗೂ ಮಹಿಳಾ ದಶಕ ಅಂತ ಮಾಡಿದರು. ಹೀಗಾಗಿ ಸರ್ಕಾರ ಪಂಚವಾರ್ಷಿಕ ಯೋಜನೆಯಲ್ಲಿ ಹೆಣ್ಣು ಮಕ್ಕಳ ಅಭಿವೃದ್ಧಿ ಮತ್ತು ಸಬಲೀಕರಣದಡಿ ಯೋಜನೆಯನ್ನು ರೂಪಿಸಿದರು.
ಕುವೆಂಪು ಅವರು ವಿಶ್ವಮಾನವ ಸಂದೇಶವನ್ನು ಕೊಟ್ಟಿದ್ದಾರೆ. ಪ್ರಗತಿಪರ ಚಳವಳಿಗೆ ಅನುಕೂಲವಾಗಿದೆ. ಈ ದೇಶ ಅಂದರೆ ಭೂಪಟವಲ್ಲ, ಧ್ವಜವೂ ಅಲ್ಲ. ಈ ಧ್ವಜಕ್ಕೆ ಅರ್ಥ ಬರುವುದು ಅಂದರೆ ಈ ದೇಶದ ಪ್ರತಿ ಮಕ್ಕಳೂ ಕೂಡ ಹಸಿನಿಂದ ಹೊರಬರಬೇಕು. ಒಳ್ಳೆ ಆರೋಗ್ಯವನ್ನು ಪಡೆದುಕೊಳ್ಳಬೇಕು. ಒಳ್ಳೆ ಶಿಕ್ಷಣವನ್ನು ಪಡೆದುಕೊಳ್ಳಬೇಕು. ವಿದ್ಯಾರ್ಥಿಗಳು ಈ ನಾಡಿನ ದೇಶದ ಭವಿಷ್ಯ, ನೀವು ಈ ನಾಡಿನ ನಾಳಿನ ಪ್ರಜೆಗಳು, ನೀವುಗಳು ಆರೋಗ್ಯವಾಗಿದ್ದೀರಿ ಅಂದರ, ಶಿಕ್ಷಣವನ್ನು ಪಡೆದುಕೊಂಡಿದ್ದೀರಿ ಅಂದ್ರೆ ಈ ದೇಶದ ಭವಿಷ್ಯ ಚನ್ನಾಗಿದೆ ಎಂದು ಅರ್ಥ ಮಾಡಿಕೊಳ್ಳಬೇಕು ಎಂದರು.
ನೀವು ಒಳ್ಳೆಯ ಉದ್ಯೋಗ ಪಡೆದುಕೊಳ್ಳುತ್ತೀರಿ ಅಂದರೆ ಅದು ಒಳ್ಳೆಯ ಸಮಾಜದ ಲಕ್ಷಣ. ಇದೆಲ್ಲವೂ ಬರಬೇಕೆಂದರೆ ಅಸಮಾನತೆ,, ತಾರತಮ್ಯ ಹೋಗಬೇಕು. ಯಾಕೆ ಕೂಲಿ ಮಾಡುವವರ ಮಕ್ಕಳು ಶಾಲೆಗೆ ಹೋಗುವುದಿಲ್ಲ. ಯಾಕೆ ಸ್ಲಂ ನಲ್ಲಿರುವ ಮಕ್ಕಳು ಶಾಲೆಗೆ ಬರಬಾರದು. ಕೆಳ ಜಾತಿ, ಸಮುದಾಯದ ಹೆಣ್ಣು ಮಕ್ಕಳು ಮತ್ತು ಗಂಡುಮಕ್ಕಳು ಶಾಲೆಗೆ ಬರಬಾರದು ಎಂದು ಪ್ರಶ್ನಿಸಿದರು.
ಸ್ವಾತಂತ್ರ್ಯ ಬಂದು 75 ವರ್ಷ ಕಳೆದರೂ ಕೆಲವರು ಮೈಬಗ್ಗಿಸದೆ ದುಡಿಯದೆ ಹಣ ಸಂಪಾದಿಸುತ್ತಾರೆ. ಕೋಟ್ಯಂತರ ಜನರ ಬೆವರನ್ನು ಬಸಿಯುತ್ತಾರೆ. ರಕ್ತವನ್ನು ಬಸಿಯುತ್ತಾರೆ. ಈ ನಾಡನ್ನು ಕಟ್ಟುತ್ತಾರೆ. ಈ ನಾಡಿನ ಆರ್ಥಿಕತೆ ಅಭಿವೃದ್ಧಿಯಾಗಿದೆ ಎಂದರೆ, ದುಡಿಯುವ ಜನರಿಂದ ಆಗಿದೆ ಎಂದರು.
ಬೆಂಗಳೂರನ್ನು ಹೈಟೆಕ್ ಸಿಟಿ ಎಂದು ಕರೆಯುತ್ತೇವೆ. ನಮಗೆ ಕುಡಿದ ನೀರು ಅಲ್ಲಾಡದಂತೆ ಹೋಗಬೇಕು. ಒಂದು ಸಣ್ಣ ಹಂಪ್ಸ್ ಮತ್ತು ಗುಂಡಿ ಬಂತು ಅಂದರೆ ಜನ ಬೈಯಲು ಶುರು ಮಾಡುತ್ತಾರೆ. ನಾವು ವಾಹನದ ಬ್ರೇಕ್ ಹಾಕಿದರೆ ಅಳ್ಳಾಡಿ ಹೋಗುತ್ತೇವೆ. ಆದರೆ ರಸ್ತೆ ನಿರ್ಮಾಣ ಮಾಡಿದವರು, ಡ್ಯಾಂಗಳನ್ನು ಕಟ್ಟುವವರು, ಕಟ್ಟಡ ಕಟ್ಟುವವರು ಬಡವರು. ಕಟ್ಟಿ ಆದ ಮೇಲೆ ಶ್ರೀಮಂತರು ಬಂದು ಸೇರಿಕೊಳ್ಳುತ್ತಾರೆ. ಈ ತಾರತಮ್ಯ ಹೋಗಬೇಕು ಎಂದರು.
ಸರ್ಕಾರ ಬಿಸಿಯೂಟ, ಆಶಾ ಕಾರ್ಯಕರ್ತೆಯರು, ಅಂಗನವಾಡಿಯವರು ಇವರೆಲ್ಲರೂ ಕೆಲಸ ಮಾಡುತ್ತಾರೆ. ಇದನ್ನು ಕೆಲಸ ಅಂತ ಕರೆಯುವುದಿಲ್ಲ. ಗೌರವಧನ ಎಂದು ಕರೆಯುತ್ತಾರೆ. ಕೊರೊನ ಸಮಯದಲ್ಲಿ ಮನೆಮನೆಗೆ ಹೋದ ಆಶಾ ಕಾರ್ಯಕರ್ತೆಯರನ್ನು ನಾಯಿಗಳು ಕಚ್ಚಿದವು. ಆದರೂ ಮನೆಮನೆಗೆ ಹೋಗಿ ನೋಡಿಕೊಂಡು ಬಂದರು. ಪೌರಕಾರ್ಮಿಕರು ರಜೆಯನ್ನೇ ನೀಡಲಿಲ್ಲ ಎಂದರು.
ಪ್ರಸ್ತಾವಿಕವಾಗಿ ಮಾತನಾಡಿದ ಮಲ್ಲಿಕಾ ಬಸವರಾಜು, ರಾಜ್ಯ ಮಟ್ಟದಲ್ಲಿ ಕಲೇಸಂ ಹುಟ್ಟಿದ ಕೆಲವೇ ತಿಂಗಳಲ್ಲಿ ತುಮಕೂರಿನಲ್ಲೂ ಕಲೇಸಂ ಘಟಕವನ್ನು ಸ್ಥಾಪಿಸಲಾಯಿತು. ಶಾಲಾ-ಕಾಲೇಜುಗಳಲ್ಲಿ ಪದವಿ ಕಾಲೇಜುಗಳಲ್ಲಿ ವಿಶ್ವವಿದ್ಯಾಲಯದಲ್ಲಿ, ಇಂಜಿನಿಯರಿಂಗ್ ಕಾಲೇಜುಗಳಲ್ಲಿ ಕಾರ್ಯಕ್ರಮವನ್ನು ಹಮ್ಮಿಕೊಂಡು ವಿದ್ಯಾರ್ಥಿಗಳಲ್ಲಿ ಜಾಗೃತಿ ಮೂಡಿಸಿದ್ದೇವೆ ಎಂದು ಹೇಳಿದರು.
ಸಮಸಮಾಜ ಕಟ್ಟಲು ಹೆಣ್ಣು ಮಕ್ಕಳ ಜೊತೆಗೆ ಗಂಡು ಮಕ್ಕಳು ಕಾರ್ಯಕ್ರಮಕ್ಕೆ ಬರಬೇಕು. ಇದು ನಮ್ಮ ಸಂಘಟನೆಯ ಧ್ಯೇಯ. ಹಾಗಾಗಿ ಹೆಣ್ಣು-ಗಂಡು ಇಬ್ಬರು ಕಾರ್ಯಕ್ರಮದಲ್ಲಿ ಭಾಗವಹಿಸಬಹುದು ಎಂದರು.
ಕಾರ್ಯಕ್ರಮದಲ್ಲಿ ಜನಪದ ಹಾಡುಗಾರ್ತಿ ಕರಿಯಮ್ಮ ಅವರಿಗೆ ದಿ.ಸೋಮಾವತಿ ಮತ್ತು ದಿ.ಇಂದಿರಮ್ಮ ನೆನಪಿನ ಸಾಧಕ ಮಹಿಳಾ ದತ್ತಿ ಪ್ರಶಸ್ತಿ ರೂ,5 ಸಾವಿರ ಕೊಟ್ಟು ಗೌರವಿಸಲಾಯಿತು. ಕಲಾವಿದೆ ರೇಣುಕಾ ಕೆಸರುಮಡು ಪ್ರಶಸ್ತಿ ಪ್ರದಾನ ಮಾಡಿದರು. ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಸರ್ಕಾರಿ ಪಾಲಿಟೆಕ್ನಿಕ್ ಪ್ರಾಂಶುಪಾಲ ಮೇಜರ್ ಅನಿಲ್ ಕುಮಾರ್ ವಹಿಸಿ ಮಾತನಾಡಿದರು. ಸರ್ಕಾರಿ ಪಾಲಿಟೆಕ್ನಿಕ್ ಕುಲಸಚಿವೆ ಡಿ.ವೀಣ, ಕಲೇಸಂ ಉಪಾಧ್ಯಕ್ಷೆ ಸಿ.ಎ.ಇಂದಿರಾ ಇದ್ದರು.