ಗಾಂಧೀಜಿಯವರ ಸತ್ಯ, ಅಹಿಂಸೆ ಮಾರ್ಗ : ಇಡೀ ವಿಶ್ವಕ್ಕೇ ಮಾದರಿ -ಶುಭ ಕಲ್ಯಾಣ್

  ತುಮಕೂರು : ಭಾರತದಿಂದ ಬ್ರಿಟೀಷರನ್ನು ತೊಲಗಿಸಿ ದೇಶಕ್ಕೆ ಸ್ವಾತಂತ್ರ್ಯ ತಂದುಕೊಡುವಲ್ಲಿ ರಾಷ್ಟ್ರಪಿತ ಮಹಾತ್ಮ ಗಾಂಧೀಜಿಯವರ ಸತ್ಯ ಮತ್ತು ಅಹಿಂಸೆ ಮಾರ್ಗವು ಇಡೀ ವಿಶ್ವಕ್ಕೇ ಮಾದರಿಯಾಗಿದೆ ಎಂದು ಜಿಲ್ಲಾಧಿಕಾರಿ ಶುಭ ಕಲ್ಯಾಣ್ ಅಭಿಪ್ರಾಯಿಸಿದರು.


  ಜಿಲ್ಲಾಡಳಿತ, ಜಿಲ್ಲಾ ಪಂಚಾಯತ್, ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆ ವತಿಯಿಂದ     ಜಿಲ್ಲಾಧಿಕಾರಿಗಳ ಕಚೇರಿ ನ್ಯಾಯಾಲಯ ಸಭಾಂಗಣದಲ್ಲಿಂದು ಏರ್ಪಡಿಸಿದ್ದ 157ನೇ  ಗಾಂಧೀ ಜಯಂತಿ  ಹಾಗೂ ಮಾಜಿ ಪ್ರಧಾನಿ ಲಾಲ್ ಬಹಾದ್ದೂರ್ ಶಾಸ್ತ್ರೀಜಿಯವರ 122ನೇ ಜಯಂತಿ   ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು ಗಾಂಧೀಜಿಯವರ ಜೀವನವೇ ಸಮಾಜಕ್ಕೆ ಒಂದು ಸಂದೇಶ.  ದೇಶದ ಸ್ವಾತಂತ್ರ್ಯಕ್ಕಾಗಿ ಅವರು ಅನುಸರಿಸಿದ ಸತ್ಯ ಮತ್ತು ಅಹಿಂಸೆ ಮಾರ್ಗವನ್ನು ಇಡೀ ವಿಶ್ವವೇ ಕೊಂಡಾಡುತ್ತಿದೆ.  ಗಾಂಧೀಜಿಯವರ ಆದರ್ಶಗಳನ್ನು   ಜಗತ್ತಿನ ಎಲ್ಲ ಖಂಡಗಳಲ್ಲಿಯೂ ಸ್ಮರಿಸಲಾಗುತ್ತದೆ. ಇಂದಿನ ಯುವಜನರು, ವಿದ್ಯಾರ್ಥಿಗಳು ಗಾಂಧಿಯವರ ಬದುಕು, ಸ್ವಾತಂತ್ರ್ಯ ಚಳುವಳಿ, ಸರಳತೆ, ಸಹಬಾಳ್ವೆ, ಅಸ್ಪøಶ್ಯತೆ ನಿವಾರಣೆಗಾಗಿ ನಡೆಸಿದ ಪ್ರಯೋಗಗಳನ್ನು ಅರಿತು ದೇಶವನ್ನು ಮುನ್ನಡೆಸಬೇಕು ಎಂದು ಕರೆ ನೀಡಿದರು.

  ಗಾಂಧೀಜಿಯವರು ಕಂಡ ಗ್ರಾಮ ಸ್ವರಾಜ್ಯ   ಹಾಗೂ ಶಾಸ್ತ್ರೀಜಿಯವರು ಕಂಡ  ಜೈ ಜವಾನ್ ಜೈ ಕಿಸಾನ್  ಕನಸನ್ನು ನನಸಾಗಿಸಲು ಜಿಲ್ಲಾಡಳಿತ   ಶ್ರಮಿಸುತ್ತಿದ್ದು,  ಕಳೆದ 3 ವರ್ಷಗಳಲ್ಲಿ 1.5 ಲಕ್ಷ ಜನರಿಗೆ ಕಂದಾಯ ಸೇವೆಗಳನ್ನು ತಲುಪಿಸುವಲ್ಲಿ ಯಶಸ್ವಿಯಾಗಿದೆ.   ಜಿಲ್ಲೆಯ ಕಡು ಬಡವರಿಗೆ ನಿವೇಶನ ಒದಗಿಸಲು ಜಿಲ್ಲಾಡಳಿತ ಪಣ ತೊಟ್ಟಿದ್ದು, ಈಗಾಗಲೇ ಕಾರ್ಯತತ್ಪರವಾಗಿದೆ ಎಂದು ತಿಳಿಸಿದರು.

  ಅಪರ ಜಿಲ್ಲಾಧಿಕಾರಿ ಡಾ: ಎನ್. ತಿಪ್ಪೇಸ್ವಾಮಿ ಮಾತನಾಡಿ   ಗಾಂಧೀಜಿ ಹಾಗೂ ಶಾಸ್ತ್ರೀಜಿ ಅವರ ಉತ್ತಮ ಚಿಂತನೆಗಳು  ನಾವಿಂದು ನೆಮ್ಮದಿಯಾಗಿ ಬದುಕಲು ಕಾರಣವಾಗಿವೆ.  ಸಮಾಜದ ಒಳಿತಿಗಾಗಿ ಈ ಮಹನೀಯರು ತಮ್ಮ ಉತ್ತಮ   ಆಲೋಚನೆಗಳನ್ನು ಆಚರಣೆಗೆ ತರುವ ಮೂಲಕ   ಜನ ಮಾನಸದಲ್ಲಿ ಇಂದಿಗೂ ಉಳಿದಿದ್ದಾರೆ.  ಪ್ರಯತ್ನ ಹಾಗೂ ಪರಿಶ್ರಮದಿಂದ ನಾವೂ ಸಹ ಜನ ಮಾನಸದಲ್ಲಿ ಉಳಿಯಬಹುದೆಂದು ಇಂದಿನ ಯವಜನಾಂಗ ಮನಗಾಣಬೇಕು.  ಗಾಂಧೀಜಿಯವರ ಸ್ವಚ್ಛ ಭಾರತದ ಪರಿಕಲ್ಪನೆ ಹಾಗೂ ಶಾಸ್ತ್ರೀಜಿಯವರ ಸಮರ್ಥ ಆಡಳಿತ ನಮಗೆಲ್ಲ ಮಾದರಿ ಎಂದು ಅಭಿಪ್ರಾಯಪಟ್ಟರು.

  ಕಾರ್ಯಕ್ರಮದಲ್ಲಿ ಉಪನ್ಯಾಸ ನೀಡಿದ ತುಮಕೂರು ವಿ.ವಿ. ರಾಜ್ಯಶಾಸ್ತ್ರ ಅಧ್ಯಾಪಕ ಅಕಾಡೆಮಿ ನಿರ್ದೇಶಕ ಪ್ರೊ: ಆರ್.ಎಲ್. ಸುನಿಲ್ ಕುಮಾರ್ ಅವರು ಗಾಂಧೀಜಿಯವರ ಬಾಲ್ಯ, ವ್ಯಾಸಂಗ, ವೃತ್ತಿ ಬದುಕು, ಸ್ವಾತಂತ್ರ್ಯ ಹೋರಾಟದಲ್ಲಿನ ಪಾತ್ರ, ರೈತರ ಪರವಾಗಿ ಕೈಗೊಂಡ ಸತ್ಯಾಗ್ರಹ, ಬ್ರಿಟೀಷರನ್ನು ಭಾರತ ಬಿಟ್ಟು ಓಡಿಸಲು ಹೋರಾಡಿದ ಕ್ವಿಟ್ ಇಂಡಿಯಾ ಚಳುವಳಿ, ನೈತಿಕ ಮೌಲ್ಯಗಳು ಸೇರಿದಂತೆ ಹಲವಾರು ಸ್ವಾತಂತ್ರ್ಯ ಹೋರಾಟದ ಮಜಲುಗಳ ಮೇಲೆ ಬೆಳಕು ಚೆಲ್ಲಿದರು.  

   ಗಾಂಧೀಜಿಯವರದು ಪಾಪವನ್ನು ವಿರೋಧಿಸಿ-ಪಾಪಿಗಳನ್ನು ಕ್ಷಮಿಸಿ ಎಂಬ ಉದಾರತೆ ಹೊಂದಿದ್ದ ವ್ಯಕ್ತಿತ್ವ.  ಬುದ್ಧನ ನೀತಿಗಳನ್ನು ತಮ್ಮ ಬದುಕಿನಲ್ಲಿ ಅಳವಡಿಸಿಕೊಂಡಿದ್ದರು. ಅವರ ಸತ್ಯ ಮತ್ತು ಅಹಿಂಸೆ ಮಾರ್ಗದಂತಹ ಆದರ್ಶ ನೀತಿಯಿಂದ ಪ್ರೇರಿತವಾದ ವಿಶ್ವಸಂಸ್ಥೆಯು ಅಕ್ಟೋಬರ್ 2ರಂದು ವಿಶ್ವದಾದ್ಯಂತ ಅಂತರಾಷ್ಟ್ರೀಯ ಅಹಿಂಸಾ ದಿನ ವನ್ನಾಗಿ ಆಚರಣೆಯನ್ನು ಜಾರಿಗೆ ತಂದಿರುವುದು ನಮ್ಮೆಲ್ಲರ ಹೆಮ್ಮೆ ಎಂದು ಗಾಂಧೀಜಿಯವರು ಮಹಾತ್ಮರೆನಿಸಿಕೊಂಡ ಕುರಿತು ವಿವರಿಸಿದರು.

  ದೇಶದ ರೈಲ್ವೆ ಮಂತ್ರಿಯಾಗಿ, 2ನೇ ಪ್ರಧಾನಿಯಾಗಿ ಲಾಲ್ ಬಹಾದ್ದೂರ್ ಶಾಸ್ತ್ರೀಯವರ ಸಮರ್ಥ ಕಾರ್ಯನಿರ್ವಹಣೆ,   ವರದಕ್ಷಿಣೆ ನಿರಾಕರಣೆ ನೀತಿ, ರೈತಪರ ಕಾಳಜಿ ಬಗ್ಗೆ ಮಾಹಿತಿ ನೀಡಿದ ಅವರು ಶಾಸ್ತ್ರೀಜಿಯವರು ಕಡುಬಡತನದಲ್ಲಿ ಹುಟ್ಟಿದರೂ ಅವರ ವಿಚಾರಧಾರೆಗಳಿಂದ ದೇಶದ ಪ್ರಧಾನಿಯಂತಹ ಉನ್ನತ ಸ್ಥಾನಕ್ಕೇರಲು ಸಾಧ್ಯವಾಯಿತು ಎಂದರಲ್ಲದೆ  ಬಡತನ ಶಾಪವಲ್ಲ-ಬಡತನವೇ ಸಾಧನೆಯ ಮೆಟ್ಟಿಲಾಗಬೇಕೆಂದು ಇಡೀ ದೇಶಕ್ಕೆ ತೋರಿಸಿಕೊಟ್ಟ ಶ್ರಮಜೀವಿಯಾಗಿದ್ದರು ಎಂದು ಬಣ್ಣಿಸಿದರು.

 ಕಾರ್ಯಕ್ರಮದಲ್ಲಿ ಕನ್ಯಾಕುಮಾರಿ ಮತ್ತು ಸಂಗಡಿಗರು ರಘುಪತಿ ರಾಘವ ರಾಜಾರಾಂ, ರಾಮ ನಾಮವ ನುಡಿ-ನುಡಿ, ಭಜಮನ ರಾಮ್, ಮತ್ತಿತರ ಭಜನಾ ಗೀತೆಗಳನ್ನು ಪ್ರಸ್ತುತಪಡಿಸಿದರು.


  ಈ ಸಂದರ್ಭದಲ್ಲಿ  ಮಹನೀಯರ ಭಾವಚಿತ್ರಕ್ಕೆ ಪುಷ್ಪಾರ್ಚನೆ ಸಲ್ಲಿಸಲಾಯಿತು.  ಗಾಂಧಿ ಜಯಂತಿ ಪ್ರಯುಕ್ತ ವಾರ್ತಾ ಇಲಾಖೆ ಹೊರತಂದಿರುವ ಗಾಂಧಿ ದರ್ಶನ ಎಂಬ ಪುಸ್ತಕವನ್ನು ಬಿಡುಗಡೆ ಮಾಡಲಾಯಿತು. 

  ಗಾಂಧೀ ಜಯಂತಿ ಅಂಗವಾಗಿ ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆ ವತಿಯಿಂದ ಪ್ರೌಢಶಾಲಾ, ಪದವಿಪೂರ್ವ ಕಾಲೇಜು ಹಾಗೂ ಕಾಲೇಜು-ಸ್ನಾತಕೋತ್ತರ ವಿಭಾಗ ಸೇರಿದಂತೆ 3 ವಿಭಾಗಗಳಲ್ಲಿ ಏರ್ಪಡಿಸಲಾಗಿದ್ದ ಬಾಪೂಜಿ ಪ್ರಬಂಧ ಸ್ಪರ್ಧೆಯಲ್ಲಿ ಆಯ್ಕೆಯಾದ ವಿಜೇತ ವಿದ್ಯಾರ್ಥಿಗಳಿಗೆ ಈ ಸಂದರ್ಭದಲ್ಲಿ ಪ್ರಮಾಣಪತ್ರ  ನೀಡಿ ಗೌರವಿಸಲಾಯಿತು. 

   ಕಾರ್ಯಕ್ರಮವನ್ನು ಡಾ: ಬಿ.ಆರ್. ಅಂಬೇಡ್ಕರ್ ಯುವಜನ ಮತ್ತು ಗ್ರಾಮೀಣಾಭಿವೃದ್ಧಿ ಸಂಸ್ಥೆಯ ಕೆ. ರಾಜಶೇಖರ್ ನಿರೂಪಿಸಿದರು.  ಅನಿಲ್‍ಕುಮಾರ್ ಸ್ವಾಗತಿಸಿದರು.

  ವಾರ್ತಾ ಸಹಾಯಕಿ ಆರ್. ರೂಪಕಲಾ, ಭೂದಾಖಲೆಗಳ ಇಲಾಖೆ ಉಪನಿರ್ದೇಶಕಿ ಭಾವನ ಬಸವರಾಜ್, ಜಿಲಾ ಖಜಾನೆಯ ಉಪನಿರ್ದೇಶಕಿ ಉಮಾ, ಮೀನುಗಾರಿಕಾ ಇಲಾಖೆಯ ಉಪನಿರ್ದೇಶಕ ಎಂ.ಎಚ್. ನಂಜುಂಡಪ್ಪ, ಗ್ರೇಡ್-2 ತಹಶೀಲ್ದಾರ್ ಕಮಲಮ್ಮ ಸೇರಿದಂತೆ ವಿವಿಧ ಇಲಾಖಾಧಿಕಾರಿಗಳು ಮತ್ತು ಸಿಬ್ಬಂದಿ, ಪ್ರಬಂಧ ಸ್ಪರ್ಧೆಯ ವಿಜೇತ ವಿದ್ಯಾರ್ಥಿಗಳು ಮತ್ತು ಪೋಷಕರು, ಸಾರ್ವಜನಿಕರು, ಮತ್ತಿತರರು ಉಪಸ್ಥಿತರಿದ್ದರು.

ಬಾಪೂಜಿ ಪ್ರಬಂಧ ಸ್ಪರ್ಧೆ ವಿಜೇತರು :-

 ಪ್ರೌಢಶಾಲಾ ವಿಭಾಗದಲ್ಲಿ ತುಮಕೂರು ತಾಲ್ಲೂಕು ಸ್ವಾಂದೇನಹಳ್ಳಿ ಗ್ರಾಮದ ಸರ್ಕಾರಿ ಪ್ರೌಢಶಾಲೆಯ 10ನೇ ತರಗತಿ ವಿದ್ಯಾರ್ಥಿನಿ ಕು. ಲೇಖನ ಬಿ.ಎಂ. ಅವರು ಗಾಂಧೀಜಿ ಕಲಿಸಿದ ಸರಳ ಜೀವನ-ಮಹಾನ್ ಸಂದೇಶ ಕುರಿತು ರಚಿಸಿದ ಪ್ರಬಂಧಕ್ಕಾಗಿ ಪ್ರಥಮ ಬಹುಮಾನ,  ಗುಬ್ಬಿ ತಾಲ್ಲೂಕು ಸಿ.ಎಸ್. ಪುರ ಕೆ.ಪಿ.ಎಸ್.ಶಾಲೆಯ 9ನೇ ತರಗತಿ ವಿದ್ಯಾರ್ಥಿನಿ ಕು.ಅಮೃತ ಹೆಚ್.ಆರ್. ಅವರು ರಚಿಸಿದ ಗಾಂಧೀಜಿಯ ಜೀವನ ಕಥೆಯಿಂದ ಕಲಿಯುವ ಐದು ಪಾಠಗಳು ಕುರಿತ ಪ್ರಬಂಧಕ್ಕಾಗಿ ದ್ವಿತೀಯ ಬಹುಮಾನ ಹಾಗೂ ಗುಬ್ಬಿ ತಾಲ್ಲೂಕು ಮಡೇನಹಳ್ಳಿ ಸರ್ಕಾರಿ ಪ್ರೌಢಶಾಲೆ 9ನೇ ತರಗತಿ ವಿದ್ಯಾರ್ಥಿನಿ ಕು. ಚಿನ್ಮಯಿ ಜೆ.ಎನ್. ಅವರು ರಚಿಸಿದ ಗಾಂಧೀಜಿ ಕಲಿಸಿದ ಸರಳ ಜೀವನ-ಮಹಾನ್ ಸಂದೇಶ ಕುರಿತ ಪ್ರಬಂಧಕ್ಕಾಗಿ ತೃತೀಯ ಬಹುಮಾನ ದೊರೆತಿದೆ. 

 ಪದವಿ ಪೂರ್ವ ಕಾಲೇಜು ವಿಭಾಗದಲ್ಲಿ ತುಮಕೂರು ನಗರದ ಶ್ರೀ ಶಾರದಾಂಬ ಪದವಿ ಪೂರ್ವ ಕಾಲೇಜು ದ್ವಿತೀಯ ಪಿಯುಸಿ(ವಿಜ್ಞಾನ ವಿಭಾಗ) ವಿದ್ಯಾರ್ಥಿನಿ ಕು. ವರಲಕ್ಷ್ಮೀ ಅವರು ಸತ್ಯ ಮತ್ತು ಅಹಿಂಸೆ-ನನ್ನ ಜೀವನದ ದಾರಿ, ಕುಣಿಗಲ್ ಬಾಲಕಿಯರ ಸರ್ಕಾರಿ ಪದವಿ ಪೂರ್ವ ಕಾಲೇಜು ದ್ವಿತೀಯ ಪಿಯುಸಿ(ವಾಣಿಜ್ಯ ವಿಭಾಗ) ವಿದ್ಯಾರ್ಥಿನಿ ಕು. ಮಾನ್ಯ ಆರ್. ಅವರು ಸತ್ಯ ಮತ್ತು ಅಹಿಂಸೆ-ನನ್ನ ಜೀವನದ ದಾರಿ ಹಾಗೂ ಪಾವಗಡ ಸರ್ಕಾರಿ ಪದವಿ ಪೂರ್ವ ಕಾಲೇಜು ಪ್ರಥಮ ಪಿಯುಸಿ ವಿದ್ಯಾರ್ಥಿನಿ ಕು. ಅನಘ ಅವರು ರಚಿಸಿದ ಅಸಮಾನತೆ ನಿವಾರಣೆಗೆ ಗಾಂಧೀಜಿ ಅವರ ಕೊಡುಗೆ ಕುರಿತ ಪ್ರಬಂಧಗಳಿಗೆ ಕ್ರಮವಾಗಿ ಪ್ರಥಮ, ದ್ವಿತೀಯ ಹಾಗೂ ತೃತೀಯ ಬಹುಮಾನ ಲಭಿಸಿದೆ.

 ಕಾಲೇಜು-ಸ್ನಾತಕೋತ್ತರ ವಿಭಾಗದಲ್ಲಿ ತುಮಕೂರು ವಿಶ್ವವಿದ್ಯಾನಿಲಯ ದ್ವಿತೀಯ ವರ್ಷದ ಸ್ನಾತಕೋತ್ತರ ಪದವಿ(ಪತ್ರಿಕೋದ್ಯಮ ಮತ್ತು ಸಮೂಹ ಸಂವಹನ ವಿಭಾಗ) ವಿದ್ಯಾರ್ಥಿನಿ ಕು. ರಂಗಲಕ್ಷ್ಮಿ ಎಚ್. ಅವರು ರಚಿಸಿದ ಸತ್ಯಾಗ್ರಹ ಇಂದಿನ ಕಾಲದ ಅವಶ್ಯಕತೆ ಕುರಿತ ಪ್ರಬಂಧಕ್ಕಾಗಿ ಪ್ರಥಮ ಬಹುಮಾನ ಹಾಗೂ ಕು.ಸುಪ್ರಿತ ಜಿ. ಅವರು ರಚಿಸಿದ ಗಾಂಧೀಜಿಯ ಶಿಕ್ಷಣ, ತತ್ವ-ನೈತಿಕತೆ, ಕೌಶಲ್ಯ, ಸೇವಾಭಾವ ಕುರಿತ ಪ್ರಬಂಧಕ್ಕಾಗಿ ದ್ವಿತೀಯ ಬಹುಮಾನ ಮತ್ತು ದ್ವಿತೀಯ ವರ್ಷದ ಪದವಿ(ಕಲಾ ವಿಭಾಗ) ವಿದ್ಯಾರ್ಥಿನಿ ಕು. ಮೇಘನ ಅವರು ರಚಿಸಿದ ನೈತಿಕ ರಾಜಕಾರಣ-ಗಾಂಧೀಜಿಯ ತತ್ವಗಳ ಇಂದಿನ ಪ್ರಾಸಂಗಿಕತೆ ಕುರಿತ ಪ್ರಬಂಧಕ್ಕಾಗಿ ತೃತೀಯ ಬಹುಮಾನ ದೊರೆತಿದೆ.