ತುಮಕೂರು:ನಗರದ ಜಿಲ್ಲಾಧಿಕಾರಿಗಳ ಕಚೇರಿ ಮುಂಭಾಗದಲ್ಲಿ ಮುಖ್ಯ ಚುನಾವಣಾ ಆಯುಕ್ತರಾದ ಜ್ಞಾನೇಶಕುಮಾರ್ ಅವರನ್ನು ಸೇವೆಯಿಂದ ವಜಾ ಮಾಡಬೇಕು ಹಾಗು ಎಸ್.ಐ.ಆರ್. ಪ್ರಕ್ರಿಯೆಯನ್ನು ರದ್ದು ಮಾಡಬೇಕೆಂದು ಆಗ್ರಹಿಸಿ ಇಂಡಿಯಾ ಮೈತ್ರಿಕೂಟದ ಎಲ್ಲಾ ಪಕ್ಷಗಳ ಮುಖಂಡರು, ಕಾರ್ಯಕರ್ತರು ಹಾಗೂ ಜನಪರ ಚಳವಳಿಗಾರರು ಪ್ರತಿಭಟನೆ ನಡೆಸಿ, ಜಿಲ್ಲಾಧಿಕಾರಿಗಳಿಗೆ ಮನವಿ ಸಲ್ಲಿಸಿದರು.
ಜಿಲ್ಲಾಧಿಕಾರಿಗಳ ಕಚೇರಿ ಬಳಿ ಸಮಾವೇಶಗೊಂಡ ಪ್ರತಿಭಟನಾಕಾರರನ್ನು ಉದ್ದೇಶಿಸಿ ಮಾತನಾಡಿದ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ಜಿ.ಚಂದ್ರಶೇಖರಗೌಡ ಮಾತನಾಡಿ,ಜ್ಞಾನೇಶಕುಮಾರ್ ಎಂಬ ಅಜ್ಞಾನಿ ಮಾಡಿದ ಕೆಲಸದ ವಿರುದ್ದ ಇಂದು ಇಡೀ ದೇಶದಾದ್ಯಂತ ಪ್ರತಿಭಟನೆಗಳು ಜರುತ್ತಿವೆ.ಎಸ್.ಐ.ಆರ್. ಹೆಸರಿನಲ್ಲಿ ಕ್ಷುಲ್ಲಕ ಕಾರಣಗಳನ್ನು ಮುಂದಿಟ್ಟುಕೊಂಡು ಜನರ ಹಕ್ಕುಗಳನ್ನು ಕಸಿಯಲಾಗುತ್ತಿದೆ.ಈ ಹೋರಾಟ ನಗರ ಮಟ್ಟಕ್ಕೆ ಸಿಮೀತವಾಗದೆ ಹಳ್ಳಿ ಹಳ್ಳಿಗಳಿಗೂ ತೆಗೆದುಕೊಂಡು ಹೋಗುತ್ತೇವೆ.ಬಿಜೆಪಿ ಮತ್ತು ಆರ್.ಎಸ್.ಎಸ್.ಹುನ್ನಾರವನ್ನು ದೇಶದ ಜನರ ಮುಂದಿಡುತ್ತೇವೆ.ಜ್ಞಾನೇಶಕುಮಾರ್ ರಾಜೀನಾಮೆ ಕೊಡುವವರೆಗೆ, ಇಲ್ಲವೇ ರಾಷ್ಟ್ರಪತಿಗಳು ಅವರನ್ನು ವಜಾ ಮಾಡುವವರೆಗೂ ಇಂಡಿಯಾ ಮೈತ್ರಿಕೂಟದ ಎಲ್ಲಾ ಪಕ್ಷಗಳ ಹೋರಾಟ ಮುಂದುವರೆಯಲಿದೆ ಎಂದರು.
ಸಿಪಿಐ(ಎಂ)ನ ಸೈಯದ್ ಮುಜೀಬ್ ಮಾತನಾಡಿ,ಮುಖ್ಯಚುನಾವಣಾ ಆಯುಕ್ತರು ಆಳುವ ಅರಸರ ಕೈಗೊಂಬೆಯಂತೆ ವರ್ತಿಸುತ್ತಾ,ಜನವಿರೋಧಿ ಕತ್ಯ ಎಸಗಿದ್ದಾರೆ.ಫಾರಂ 07ರ ಮೂಲಕ ಜನರ ಹಕ್ಕು ಕಸಿಯಲು ಹೊರಟವರ ವಿರುದ್ದ ಕಾನೂನು ಕ್ರಮಕ್ಕೆ ಇಂಡಿಯಾ ಮೈತ್ರಿಕೂಟ ಒತ್ತಾಯಿಸಿದರೆ,ಎನ್.ಡಿ.ಎ ಮೈತ್ರಿ ಕೂಟ ಅವರನ್ನು ರಕ್ಷಿಸಲು ಹೊರಟಿದೆ.ಕಳ್ಳರಿಗೆ ಬೆಂಬಲವಾಗಿ ನಿಂತಿದೆ.ಬಿಜೆಪಿ ಮತ್ತು ಜೆಡಿಎಸ್ ಪಕ್ಷದ ಮುಖಂಡರು ಜನರ ಹಕ್ಕುಗಳನ್ನು ರಕ್ಷಿಸುವ ಬದಲು, ಜನರು ಶಾಶ್ವತ ವಾಸಸ್ಥಳ ಧೃಢೀಕರಣ ಪತ್ರಕ್ಕಾಗಿ ಕಚೇರಿಗಳಿಗೆ ಅಲೆಯುವಂತೆ ಮಾಡಿದ್ದಾರೆ.ಎಸ್.ಐ.ಆರ್. ಎಂಬುದೇ ಒಂದು ಸಂವಿಧಾನ ವಿರೋಧಿ ಕೃತ್ಯ. ಇದರ ವಿರುದ್ದ ದೇಶದ ನಾಗರಿಕರೆಲ್ಲರೂ ಪ್ರತಿಭಟಿಸಬೇಕೆಂದು ಮನವಿ ಮಾಡಿದರು.
ಜಿಲ್ಲಾ ಕಾಂಗ್ರೆಸ್ ಪ್ರಚಾರ ಸಮಿತಿ ಅಧ್ಯಕ್ಷ ಇಕ್ಬಾಲ್ ಅಹಮದ್ ಮಾತನಾಡಿ, ಎಸ್. ಐ.ಆರ್.ಮೂಲಕ ದೇಶದಲ್ಲಿ ಅರಾಜಕತೆ ಸೃಷ್ಟಿ ಮಾಡಲಾಗಿದೆ.ಮುಖ್ಯ ಚುನಾವಣಾ ಆಯುಕ್ತರ ಮಾಡಿರುವುದು ದೇಶದ್ರೋಹದ ಕೆಲಸ.ಹಾಗಾಗಿ ಅವರನ್ಬು ಈ ಕೂಡಲೇ ವಜಾ ಮಾಡಬೇಕು.ಇಂಡಿಯಾ ಒಕ್ಕೂಟದ ಸಂಪ್ರದಾಯಕ ಮತಗಳಾದ ಅಹಿಂದ ಮತಗಳನ್ನು ಕಿತ್ತು ಹಾಕಿ, ಪ್ರಜಾಪ್ರಭುತ್ವ ವ್ಯವಸ್ಥೆಯನ್ನೇ ಹಾಳುಗೆಡವಲಾಗಿದೆ.12 ವರ್ಷ ಅಧಿಕಾರದಲ್ಲಿದ್ದೂ ನಸುಳುಕೋರರಿಗೆ ಅವಕಾಶ ಕಲ್ಪಿಸಿದ್ದು, ಕೇಂದ್ರ ಸರಕಾರದ ವೈಫಲ್ಯ.ಹಾಗಾಗಿ ಪ್ರಧಾನಿ ಮತ್ತು ಗೃಹ ಸಚಿವರೂ ರಾಜೀನಾಮೆ ನೀಡಬೇಕೆಂದರು.
ಸಿಪಿಐನ ಗಿರೀಶ್ ಮಾತನಾಡಿ,ರಾಷ್ಟ್ರಪತಿಗಳಿಗೂ ಇಲ್ಲದ ವಿಶೇಷ ಅಧಿಕಾರವನ್ನು ಮುಖ್ಯ ಚುನಾವಣಾ ಆಯುಕ್ತರಿಗೆ ನೀಡಿ,ಅವರ ಮೂಲಕ ವೋಟ್ ಚೋರಿ ನಡೆಸಿ,ಅಧಿಕಾರ ಹಿಡಿಯಲು ಬಿಜೆಪಿ ಮತ್ತು ಆರ್.ಎಸ್.ಎಸ್ ಹೊರಟಿದೆ. ಸಾಂವಿಧಾನಿಕ ಅಂಗಗಳನ್ನು ದುರುಪಯೋಗ ಪಡಿಸಿಕೊಂಡು,ಅಧಿಕಾರದ ಚುಕ್ಕಾಣಿ ಹಿಡಿದಿರುವ ಬಿಜೆಪಿ ಮತ್ತು ಅದಕ್ಕೆ ಸಹಕರಿಸಿದ ಚುನಾವಣಾ ಮುಖ್ಯ ಆಯುಕ್ತರ ವಿರುದ್ದ ಇಂಡಿಯಾ ಮೈತ್ರಿಕೂಟ ಹೋರಾಟ ಮತ್ತಷ್ಟು ತೀವ್ರಗೊಳಿಸಲಿದೆ ಎಂದರು.
ಮಾಜಿ ಶಾಸಕ ಡಾ.ರಫೀಕ್ ಅಹಮದ್ ಮಾತನಾಡಿ,ಮುಖ್ಯ ಚುನಾವಣಾ ಆಯುಕ್ತರಾದ ಜ್ಞಾನೇಶಕುಮಾರ್ ಅವರ ತಪ್ಪುಗಳನ್ನು ಎತ್ತಿ ಹಿಡಿದು ಪ್ರಶ್ನಿಸಿದ ಲೋಕಸಭೆಯ ವಿರೋಧಪಕ್ಷದ ನಾಯಕರಾದ ರಾಹುಲ್‍ಗಾಂಧಿ ಅವರನ್ನು ಅತ್ಯಂತ ನಿರ್ಲಕ್ಷದಿಂದ ಕಂಡಿರುವುದಲ್ಲದೆ, ಪ್ರತಿಭಟನೆ ನಡೆಸಿದ್ದಕ್ಕೆ ಎಫ್.ಐ.ಆರ್.ದಾಖಲಿಸಲಾಗುತ್ತಿದೆ.ಮತ್ತೊಂದು ಸುತ್ತಿನ ಸ್ವಾತಂತ್ರ ಹೋರಾಟಕ್ಕೆ ನಾವೆಲ್ಲರೂ ಸಿದ್ದರಾಗುವ ಅನಿವಾರ್ಯತೆ ಇದೆ ಎಂದರು.
ಅಮ್ ಆದ್ಮಿ ಪಕ್ಷದ ಜಯರಾಮಯ್ಯ ಮಾತನಾಡಿ,ಆರ್.ಎಸ್.ಎಸ್.ಕಪಿ ಮುಷ್ಟಿಯಲ್ಲಿ ಇಂದು ದೇಶ ಇದೆ.ಎಲ್ಲೆಡೆ ಬಿಜೆಪಿ ನಾಯಕರ ವಿರುದ್ದ ಯುವಜನರು ತಮ್ಮ ಆಕ್ರೋಶ ಹೊರ ಹಾಕುತಿದ್ದಾರೆ.ಜಾತಿ,ಧರ್ಮದ ಹೆಸರಿನಲ್ಲಿ ಜನರನ್ನು ಒಡೆದು ಅಧಿಕಾರ ಅನುಭವಿಸಲು ಹೊರಟವರಿಗೆ ಯುವಜನರು ತಕ್ಕ ಬುದ್ದಿ ಕಲಿಸಬೇಕಾಗಿದೆ ಎಂದರು.
ಸರ್ವೋದಯ ಕರ್ನಾಟಕದ ಪಂಡಿತ್ ಜವಹರ್ ಮಾತನಾಡಿ,ಯಾವ ಯುವಜನರನ್ನು ಭ್ರಮಾ ಲೋಕಕ್ಕೆ ತಳ್ಳಿ ಅಧಿಕಾರಕ್ಕೆ ಬಂದರೋ ಅದೇ ಯುವಜನರು ಇಂದು ಬಿಜೆಪಿ ವಿರುದ್ದ ತಿರುಗಿ ಬಿದಿದ್ದಾರೆ.ಎಸ್.ಐ.ಆರ್.ಪ್ರಕ್ರಿಯೆ ರದ್ದಾಗುವ ಜೊತೆಗೆ, ಆಕ್ರಮವಾಗಿ ಗೆಲುವು ಸಾಧಿಸಿರುವ ಬಿಹಾರ, ಪಶ್ಚಿಮ ಬಂಗಾಳ, ಮಹಾರಾಷ್ಟ್ರ, ಹರಿಯಾಣ ರಾಜ್ಯಗಳ ಚುನಾವಣೆಗಳನ್ನು ರದ್ದು ಪಡಿಸಬೇಕೆಂದರು.
ನಿವೃತ್ತ ಅಧಿಕಾರಿ ಡಾ.ವೈ.ಕೆ.ಬಾಲಕೃಷ್ಣಪ್ಪ ಮಾತನಾಡಿ, ಎಸ್.ಐ.ಆರ್ ಎಂಬುದು ಪ್ರಜಾಪ್ರಭುತ್ವ ವಿರೋಧಿಯಾಗಿದ್ದು, ಅದನ್ನು ಕೂಡಲೇ ರದ್ದು ಮಾಡುವುದರ ಜೊತೆಗೆ, ಇದಕ್ಕೆ ಸಹಕರಿಸಿದ ಜ್ಞಾನೇಶಕುಮಾರ್ ಅವರನ್ನು ವಜಾಗೊಳಿಸಬೇಕೆಂದರು.
ಸಂಶೋಧನಾರ್ಥಿ ನವೀನ್ ಪೂಜಾರಹಳ್ಳಿ, ಎಸ್.ಯುಸಿಐನ ಕಲ್ಯಾಣಿ ಮಾತನಾಡಿದರು.ಈ ಸಂಬಂಧ ಮನವಿಯನ್ನು ಜಿಲ್ಲಾಧಿಕಾರಿಗಳ ಕಚೇರಿ ಸಹಾಯಕರಿಗೆ ಸಲ್ಲಿಸಲಾಯಿತು.
ಪ್ರತಿಭಟನೆಯಲ್ಲಿ ಮಾಜಿ ಶಾಸಕ ಡಾ.ಎಸ್.ಷಪಿಅಹಮದ್,ಕೆ.ಎಸ್.ಕಿರಣ್‍ಕುಮಾರ್,ಮುಖಂಡರಾದ ಗೋವಿಂದರಾಜು, ಹೆಚ್.ಸಿ.ಹನುಮಂತಯ್ಯ,ನಯಾಜ್ ಅಹಮದ್,ಷಣ್ಮುಗಪ್ಪ,ಸಿಪಿಐ(ಎಂ)ನ ಎನ್.ಕೆ.ಸುಬ್ರಮಣ್ಯ,ಬಿ.ಉಮೇಶ್, ಡಿವೈಎಫ್.ಐ ನ ಎಸ್.ರಾಘವೇಂದ್ರ,ಕಾಂಗ್ರೆಸ್ ಪಕ್ಷದ ಸಂಜೀವ್‍ಕುಮಾರ್, ಸೈಯದ್ ದಾದಾಪೀರ್, ಕುಮಾರಸ್ವಾಮಿ, ಶ್ರೀನಿವಾಸ್‍ಕುಮಾರ್, ಪಂಡಿತ್ ನಾರಾಯಣಪ್ಪ,ಅನಿಲ್‍ಕುಮಾರ್,ನರಸೀಯಪ್ಪ, ನಿಂಗರಾಜು,ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷರುಗಳಾದ ಮಹೇಶ್,ಫಯಾಜ್, ಮೆಹಬೂಬ್ ಪಾಷ, ಆಟೋ ರಾಜು, ಎಸ್‍ಯುಸಿಐನ ಮಂಜುಳ ಗೋನಾವರ್, ಕಲ್ಯಾಣಿ, ಕವಿತಾ, ಕೈದಾಳ ರಮೇಶ್,ಗುರುಪ್ರಸಾದ್,ಆದಿಲ್ ಸೇರಿದಂತೆ ಹಲವರು ಪಾಲ್ಗೊಂಡಿದ್ದರು.