ತುಮಕೂರು : ಆಗ್ನೇಯ ಪದವಿಧರರ ಕ್ಷೇತ್ರದ ಚುನಾವಣೆಗೆ ಇನ್ನ ಕೇವಲ 9 ದಿನಗಳಿದ್ದರೂ ರಾಜ್ಯದ ಉಪಮುಖ್ಯಮಂತ್ರಿ ಹಾಗೂ ತುಮಕೂರು ಜಿಲ್ಲಾ ಉಸ್ತುವಾರಿ ಸಚಿವರಾದ ಡಾ.ಜಿ.ಪರಮೇಶ್ವರ್ ಇದುವರೆವಿಗೂ ಪ್ರಚಾರ ಮಾಡಿಲ್ಲ, ಇದರಿಂದ ಕಾಂಗ್ರೆಸ್ ನ ಯುವಕರನ್ನು ಈಗಾಗಲೇ ಓಡಿಸಿದ್ದು, ಶಶಿ ಹುಲಿಕುಂಟೆ ಮಠ್ ರವರನ್ನೂ ಹರಕೆಯ ಕುರಿ ಮಾಡಿ ಓಡಿಸಲು ಮುಂದಾಗಲಾಗಿದೆ ಎಂಬ ಮಾತುಗಳು ಕಾಂಗ್ರೆಸ್ ಪಕ್ಷದಲ್ಲೇ ಹರಿದಾಡುತ್ತಿವೆ.
ಈ ಹಿಂದೆ ಗುಬ್ಬಿಯಲ್ಲಿ ಕಾಂಗ್ರೆಸ್ ಪಕ್ಷವನ್ನು ಕಟ್ಟಿದ ಜಿ.ಎಸ್.ಪ್ರಸನ್ನಕುಮಾರ್, ತುಮಕೂರು ಗ್ರಾಮಾಂತರ ಕ್ಷೇತ್ರದ ಅಭ್ಯರ್ಥಿಯಾಗಿದ್ದ ರಾಯಸಂದ್ರ ರವಿಕುಮಾರ್, ಚಿಕ್ಕನಾಯಕನಹಳ್ಳಿಯ ಗೊಲ್ಲ ಸಮುದಾಯದ ಸಾಸಲು ಸತೀಶ್ ಅವರು ತುಮಕೂರು ಜಿಲ್ಲಾ ಕಾಂಗ್ರೆಸ್ ನ್ನು ಕಟ್ಟುವಲ್ಲಿ ಪ್ರಮುಖ ಪಾತ್ರವನ್ನು ವಹಿಸಿದ ಯುವ ನಾಯಕರುಗಳು, ಕಾಂಗ್ರೆಸ್ ಪಕ್ಷವನ್ನು ಕಟ್ಟಿ ಬೆಳೆಸಿದರು, ಅವರಿಗೂ ರಾಜಕೀಯವಾಗಿ ಮುಂದೆ ಬರಬೇಕೆಂಬ ಮಹಾದಾಸೆ ಇತ್ತು, ಆದರೆ ಇವರು ತಮ್ಮ ನಾಯಕರೆಂದು ಒಪ್ಪಿಕೊಂಡಿದ್ದ, ದಿನವೂ ಪೂಜಿಸುತ್ತಿದ್ದ ನಾಯಕರುಗಳಾದ ಡಾ.ಜಿ.ಪರಮೇಶ್ವರ್, ಕೆ.ಎನ್.ರಾಜಣ್ಣ, ಮತ್ತು ಟಿ.ಬಿ.ಜಯಚಂದ್ರ ಅವರುಗಳು ತಮ್ಮ ರಾಜಕೀಯ ಭಸ್ಮಾಸುರ ಬೂದಿಯಿಂದ ಸುಟ್ಟು ಹಾಕಿ, ಆ ರಾಜಕೀಯ ಬೂದಿಯಿಂದ ಇವರು ಎದ್ದು ಬರಲು ಆಗದಂತೆ ನೇಪತ್ಯಕ್ಕೆ ಹೋಗುವಂತೆ ಮಾಡಿದರು.
ಈಗ ಆಗ್ನೇಯ ಪದವಿಧರರ ಕ್ಷೇತ್ರದ ಚುನಾವಣೆಗೆ ನಿಂತಿರುವ ಶಶಿ ಹುಲಿಕುಂಟೆಯನ್ನೂ ಅದೇ ರೀತಿ ಬೂದಿ ಮಾಡಲು ಹೊರಟಿದ್ದಾರೆಂದು ಕಾಂಗ್ರೆಸ್ ನ ನಾಯಕರುಗಳೇ ಮಾತನಾಡುತ್ತಿದ್ದಾರೆ, ಶಶಿ ಹುಲಿಕುಂಟೆಗೆ ಟಿಕೆಟ್ ಕೊಟ್ಟು 9 ತಿಂಗಳಾದರೂ, ಉಪಮುಖ್ಯ ಮಂತ್ರಿ ಡಾ.ಜಿ.ಪರಮೇಶ್ವರ್, ಕೆ.ಎನ್.ರಾಜಣ್ಣ, ಟಿ.ಬಿ.ಜಯಚಂದ್ರ ಅವರುಗಳು ಪ್ರಚಾರವನ್ನೂ ಮಾಡಿಲ್ಲ ಪದವಿಧರರ ಒಂದೂ ಸಭೆಯನ್ನೇ ಮಾಡಿಲ್ಲ, ಶಶಿ ಹುಲಿಕುಂಟೆ ಗೆದ್ದರೆಷ್ಟು, ಬಿಟ್ಟರೆಷ್ಟು ಅವನೇನು ನಮ್ಮ ಮಗನಾ, ಮಗನಾದರೆ ರಾತ್ರಿ ಹಗಲು ಪ್ರಚಾರ ಮಾಡುತ್ತಿದ್ದೆವು ಎಂಬ ಧೋರಣೆಯನ್ನು ಹೊಂದಿರುವ ಈ ನಾಯಕರುಗಳು, ತುಮಕೂರು ಜಿಲ್ಲೆಯಲ್ಲಿ ಕಾಂಗ್ರೆಸ್ ಪಕ್ಷವನ್ನು ನೆಲ ಕಚ್ಚುವಂತೆ ಮಾಡಿದ್ದಾರೆ.
ಪಾಪ ಮಾಜಿ ಶಾಸಕರಾದ ಡಿ.ಸಿ.ಗೌರಿಶಂಕರ್, ಡಾ.ರಫೀಕ್ ಅಹ್ಮದ್, ತುಮಕೂರು ನಗರ ವಿಧಾನಸಭಾ ಕ್ಷೇತ್ರದ ಪರಾಭವ ಅಭ್ಯರ್ಥಿ ಇಕ್ಬಾಲ್ ಅಹ್ಮದ್, ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷರಾದ ಚಂದ್ರಶೇಖರಗೌಡ, ತುಮಕೂರು ಗ್ರಾಮಾಂತರವಿಧಾನಸಭಾ ಕ್ಷೇತ್ರದ ಪರಾಭವ ಅಭ್ಯರ್ಥಿ ಷಣ್ಮುಖಪ್ಪ ಮತ್ತು ಸರ್ಕಾರಿ ನೌಕರಿಗೆ ರಾಜೀನಾಮೆ ಕೊಟ್ಟು ಜಿಲ್ಲಾ ಪಂಚಾಯಿತಿ ಸದಸ್ಯರಾಗುವ ಕನಸ್ಸು ಕಾಣುತ್ತಿರುವ ಸರ್ಕಾರಿ ನೌಕರರ ಸಂಘದ ಮಾಜಿ ಅಧ್ಯಕ್ಷ ನರಸಿಂಹರಾಜು ಅವರುಗಳು ಪತ್ರಿಕಾಗೋಷ್ಠಿ ನಡೆಸಿ ಶಶಿ ಹುಲಿಕುಂಟೆಯವರಿಗೆ ಬೆಂಬಲ ಸೂಚಿದರೂ ಈ ಮೇಲಿನ ಮೂವರು ನಾಯಕರುಗಳು ಇದುವರೆವಿಗೂ ಬಾಯಿ ಬಿಟ್ಟಿಲ್ಲ.
ಇದರಿಂದ ಶಶಿ ಹುಲಿಕುಂಟೆಯು ಸಹ ಚುನಾವಣೆಯ ನಂತರ ನೇಫತ್ಯಕ್ಕೆ ಸರಿದು ತಮ್ಮ ರಾಜಕೀಯ ಆಸೆಯನ್ನು ಈಗಾಗಲೇ ರಾಜಕೀಯ ಭಗ್ನಪ್ರೇಮಿಗಳಾಗಿ ನರಳುತ್ತಿರುವವರ ಸಾಲಿಗೆ ಶಶಿ ಹುಲಿಕುಂಟೆಯೂ ರಾಜಕೀಯ ಭಗ್ನಪ್ರೇಮಿಯಾಗಲಿದ್ದಾರೆಯೇ ಎಂಬುದನ್ನು ಕಾದು ನೋಡಬೇಕಿದೆ.
ಅಂದರೆ ಶಶಿ ಹುಲಿಕುಂಟೆಯನ್ನೂ ಈ ಮೇಲಿನ ಯುವ ನಾಯಕರಂತೆ ಮೂಲೆ ಗುಂಪು ಮಾಡಲು ಈ ರಾಜಕರಣಿಗಳು ಮುಂದಾಗಿದ್ದಾರೆನ್ನಲಾಗುತ್ತಿದೆ. ಈ ಮೂರು ಜನ ರಾಜಕಾರಣಿಗಳು ಹುಲಿಕುಂಟೆ ಶಶಿ ನಮ್ಮ ಪಕ್ಷದಿಂದ ಈಗ ಆಗ್ನೇಯ ಪದವಿಧರರ ಕ್ಷೇತ್ರದ ಚುನಾವಣೆಗೆ ನಿಂತಿದ್ದಾರೆ ಅವರಿಗೆ ಮತ ನೀಡಿ ಎಂದು ಮೂರು ನಿಮಿಷವೂ ಮಾತನಾಡಿಲ್ಲ.
ಚುನಾವಣೆಗೆ ಇನ್ನ ಕೇವಲ 9 ದಿನಗಳಿದ್ದು ಪ್ರಚಾರ ಮಾಡುವುದಾಗಿ ಯಾವ ನಾಯಕರುಗಳು ಇದುವರೆವಿಗೂ ಹೇಳಿಲ್ಲ, ಪತ್ರಿಕಾ ಹೇಳಿಕೆಯನ್ನೂ ನೀಡಿಲ್ಲ, ಹೀಗಾಗಿ ಶಶಿ ಹುಲಿಕುಂಟೆಗೆ ಸೋರೆಕಾಯಿಯೇ ಗಟ್ಟಿ ಅನ್ನಿಸುತ್ತದೆ.
ಇದಲ್ಲದೆ ಆಗ್ನೇಯ ಪದವಿಯ ಚುನಾವಣೆಯಲ್ಲಿ ಗೊಲ್ಲ ಸಮುದಾಯದ ಚಿಕ್ಕರಾಜುರವರು ಸ್ಪರ್ಧೆ ಮಾಡುತ್ತಿದ್ದು, ಚಿಕ್ಕರಾಜು ಅವರು ಈ ಹಿಂದೆ ಕಾಂಗ್ರೆಸ್ ಪಕ್ಷದಿಂದ ತಾಲ್ಲೂಕು ಪಂಚಾಯಿತಿ ಚುನಾವಣೆಯ ಟಿಕೆಟ್ ಪಡೆದು ಸ್ಪರ್ಧೆ ಮಾಡಿದ್ದವರು, ಈಗ ಪಕ್ಷೇತರ ಅಭ್ಯರ್ಥಿಯಾಗಿ ಸ್ಪರ್ಧಿಸಿರುವುದು ಯಾರನ್ನು ಸೋಲಿಸುವುದು ಎಂಬ ಯಕ್ಷ ಪ್ರಶ್ನೆ ಕಾಡುತ್ತಿದ್ದು, ಈ ಅಭ್ಯರ್ಥಿ ಯಾರ ಬೆಂಬಲದಿಂದ ನಿಂತಿದ್ದಾರೆ ಎಂಬುದು ಚುನಾವಣೆ ಹತ್ತಿರ ಬಂದಾಗ ಗೊತ್ತಾಗಲಿದೆ.
ಗೊಲ್ಲ ಸಮುದಾಯವು ಚಿತ್ರದುರ್ಗ ಮತ್ತು ತುಮಕೂರು ಜಿಲ್ಲೆಗಳಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿದ್ದು, ಈ ಮತಗಳನ್ನು ಪಡೆದು ಬಿಜೆಪಿಯ ಅಭ್ಯರ್ಥಿ ಗೆಲುವಿಗೆ ಸಹಕಾರಿಯಾಗಲು ಇವರನ್ನು ನಿಲ್ಲಿಸಲಾಗಿದೆ ಎಂದು ಹೇಳಲಾಗುತ್ತಿದೆ, ಹಾಗಾದರೆ ಈ ಜಿಲ್ಲೆಯ ಉಸ್ತುವಾರಿ ಸಚಿವರು ಯಾರನ್ನು ಗೆಲ್ಲಿಸಲು ಹೊರಟಿದ್ದಾರೆ ಎಂಬ ಪ್ರಶ್ನೆ ನೇರವಾಗಿ ಕಾಂಗ್ರೆಸ್ ಪಕ್ಷದಲ್ಲೇ ಚರ್ಚೆ ನಡೆಯತ್ತಾ ಇದೆ.
ನಿರಂತರವಾಗಿ ಗೆಲ್ಲುತ್ತಾ ಬಂದಿರುವ ಬಿಜೆಪಿ ಪಕ್ಷದ ಅಭ್ಯರ್ಥಿಯ ಸಾಧನೆ ಏನು?,-ಮಾಜಿ ಶಾಸಕ ಡಿ.ಸಿ.ಗೌರಿಶಂಕರ್
ಆಗ್ನೇಯ ಪದವಿಧರರ ಕ್ಷೇತ್ರದ ಚುನಾವಣೆಗೆ ಸಂಬಂಧಿಸಿದಂತೆ ಪಕ್ಷದ ಹಿರಿಯ ನಾಯಕರುಗಳು,ಪಕ್ಷದ ಮುಖಂಡರಗಳ ತೀರ್ಮಾನದಂತೆ ಶಶಿ ಹುಲಿಕುಂಟೆ ಮಠ್ ಅವರನ್ನು ಕಳೆದ 9 ತಿಂಗಳ ಹಿಂದೆಯೇ ಪಕ್ಷದ ಅಧಿಕೃತ್ಯ ಅಭ್ಯರ್ಥಿ ಎಂದು ಘೋಷಿಸಿ, ಕ್ಷೇತ್ರದಲ್ಲಿ ಪ್ರಚಾರ ಮಾಡಲು ಅವಕಾಶ ಕಲ್ಪಿಸಿದ್ದು,ಈ ಬಾರಿ ಆಗ್ನೇಯ ಪದವಿಧರರ ಕ್ಷೇತ್ರದಿಂದ ಕಾಂಗ್ರೆಸ್ ಅಭ್ಯರ್ಥಿ ಜಯಗಳಿಸಲಿದ್ದಾರೆ ಎಂದು ತುಮಕೂರು ಗ್ರಾಮಾಂತರದ ಮಾಜಿ ಶಾಸಕ ಡಿ.ಸಿ.ಗೌರಿಶಂಕರ್ ತಿಳಿಸಿದ್ದಾರೆ.
ಸೋಮವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು,ನಿರುದ್ಯೋಗಿ ಯುವಜನರಿಗೆ ಯುವ ನಿಧಿ ಸೇರಿದಂತೆ,ವಿದ್ಯಾರ್ಥಿಗಳಿಗೆ ಉಚಿತ ಬಸ್‍ಪಾಸ್ ಹಾಗೂ ಪಂಚ ಗ್ಯಾರಂಟಿಗಳ ಮೂಲಕ ಪಕ್ಷ ಯುವಜನರ ಬೆಂಬಲಕ್ಕೆ ನಿಂತಿದೆ. ಹಾಗಾಗಿ ಆಗ್ನೇಯ ಪದವಿಧರರ ಕ್ಷೇತ್ರದ ಚುನಾವಣೆಯಲ್ಲಿ ಶಶಿ ಹುಲಿಕುಂಟೆ ಮಠ್‍ಗೆ ಮತದಾರರ ಬೆಂಬಲ ದೊರೆಯಲಿದೆ ಎಂದರು.
ಬೇರೆ ಪಕ್ಷದ ಅಭ್ಯರ್ಥಿಯಂತೆ ಕಾಂಗ್ರೆಸ್ ಪಕ್ಷ ಉದ್ಯಮಿಗಳಿಗೆ ಟಿಕೇಟ್ ನೀಡಿಲ್ಲ.ಬದಲಾಗಿ ಓರ್ವ ಸಾಮಾನ್ಯ ಕಾರ್ಯಕರ್ತನಿಗೆ ಎಂ.ಎಲ್.ಸಿ. ಟಿಕೇಟ್ ನೀಡಿ, ಯುವಜನರನ್ನು ಪ್ರತಿನಿಧಿಸಲು ಅವಕಾಶ ಕಲ್ಪಿಸಿದೆ.ಆದರೆ ಕಳೆದ 9 ಚುನಾವಣೆಗಳಿಂದ ಈ ಕ್ಷೇತ್ರದಿಂದ ನಿರಂತರವಾಗಿ ಗೆಲ್ಲುತ್ತಾ ಬಂದಿರುವ ಬಿಜೆಪಿ ಪಕ್ಷದ ಅಭ್ಯರ್ಥಿಯ ಸಾಧನೆ ಏನು?, ಈ ಹಿಂದೆ ಈ ಕ್ಷೇತ್ರವನ್ನು ಪ್ರತಿನಿಧಿಸಿರುವ ಅಭ್ಯರ್ಥಿ ಯುವ ಜನರಿಗಾಗಿ, ಪದವಿಧರರಿಗಾಗಿ, ಶಿಕ್ಷಕರಿಗಾಗಿ ಏನು ಮಾಡಿದ್ದಾರೆ ಎಂಬುದನ್ನು ಮತದಾರರ ಮುಂದಿಡಬೇಕು.ಸುಮಾರು 1.30 ಲಕ್ಷ ಮತದಾರರಲ್ಲಿ 49 ಸಾವಿರ ಮತಗಳು ತುಮಕೂರು ಜಿಲ್ಲೆಯಲ್ಲಿವೆ.ಪ್ರತಿ ಮತದಾರರನ್ನು ಈಗಾಗಲೇ ನಮ್ಮ ಅಭ್ಯರ್ಥಿ ಭೇಟಿಯಾಗಿ ಮತಯಾಚನೆ ಮಾಡಿದ್ದಾರೆ.ಪದವಿಧರರ ಹಾಗೂ ಶಿಕ್ಷಕರ ಸಮಸ್ಯೆಗಳನ್ನು ಆಲಿಸಿದ್ದು, ಅವರ ಪರವಾಗಿ ವಿಧಾನಪರಿಷತ್ತಿನಲ್ಲಿ ದ್ವನಿ ಎತ್ತಲಿದ್ದಾರೆ ಎಂಬ ವಿಶ್ವಾಸ ನಮಗಿದೆ.ಹಾಗಾಗಿ ಪದವಿಧರರು ಕಾಂಗ್ರೆಸ್ ಪಕ್ಷದ ಅಭ್ಯರ್ಥಿ ಶಶಿ ಹುಲಿಕುಂಟೆ ಮಠ್ ಅವರಿಗೆ ಮೊದಲ ಪ್ರಾಶಸ್ತ್ಯದ ಮತ ನೀಡಬೇಕೆಂದು ಡಿ.ಸಿ.ಗೌರಿಶಂಕರ್ ಮನವಿ ಮಾಡಿದರು.
ಮಾಜಿ ಶಾಸಕರಾದ ಡಾ.ರಫೀಕ್ ಅಹಮದ್ ಮಾತನಾಡಿ,ಪಕ್ಷ ಯುವ ಅಭ್ಯರ್ಥಿಯನ್ನು ಈ ಬಾರಿ ಕಣಕ್ಕೆ ಇಳಿಸಿದೆ.ಈಗಾಗಲೇ ಎರಡು ಬಾರಿ ಐದು ಜಿಲ್ಲೆ, 33 ವಿಧಾನಸಭಾ ಕ್ಷೇತ್ರಗಳನ್ನು ಒಳಗೊಂಡ ಆಗ್ನೇಯ ಪದವಿಧರರ ಕ್ಷೇತ್ರದ ಮತದಾರರನ್ನು ಭೇಟಿಯಾಗಿ ಮತಯಾಚನೆ ಮಾಡಿದ್ದಾರೆ.ಅಲ್ಲದೆ ಪಕ್ಷದ ಎಲ್ಲಾ ನಾಯಕರು ಒಗ್ಗೂಡಿ ಅವರ ಗೆಲುವಿಗೆ ಶ್ರಮಿಸುತಿದ್ದು, ಸರಕಾರದ ಗ್ಯಾರಂಟಿ ಯೋಜನೆಗಳು ನಮ್ಮ ನೆರವಿಗೆ ಬರಲಿವೆ ಎಂದರು.
ಜಿಲ್ಲಾ ಕಾಂಗ್ರೆಸ್ ಪ್ರಚಾರ ಸಮಿತಿ ಅಧ್ಯಕ್ಷರಾದ ಇಕ್ಬಾಲ್ ಅಹಮದ್ ಮಾತನಾಡಿ, ನಮ್ಮ ಅಭ್ಯರ್ಥಿ ಶಶಿ ಹುಲಿಕುಂಟೆ ಮಠ ಯುವಕರಾಗಿದ್ದು,ಪ್ರಚಲಿತ ವಿದ್ಯಮಾನಗಳನ್ನು ಬಲ್ಲವರಾಗಿದ್ದಾರೆ.ಎಸ್.ಐ.ಆರ್.ಆ ನಂತರದಲ್ಲಿ ಕೇಂದ್ರ ಸರಕಾರ ಯುವಜನ ರೊಂದಿಗೆ ನಡೆದುಕೊಳ್ಳುತ್ತಿರುವ ರೀತಿಗಳ ಬಗ್ಗೆ ಅರಿವಿದೆ.ಅಲ್ಲದೆ ಯುವಜನರಿಗೂ ಇದರ ಅರಿವಿದೆ.ಹಾಗಾಗಿ ಪದವಿಧರರು ನಮ್ಮ ಪಕ್ಷದ ಪರವಾಗಿ ಮತ ಚಲಾಯಿಸಲಿದ್ದಾರೆ ಎಂಬ ನಂಬಿಕೆ ನಮಗಿದೆ.ಶಶಿ ಹುಲಿಕುಂಟೆ ಮಠ್ ಪದವಿಧರರ ಪರವಾಗಿ ಕೆಲಸ ಮಾಡಲಿದ್ದಾರೆ ಎಂಬ ನಂಬಿಕೆ ನಮಗಿದೆ. ಹಾಗಾಗಿ ಪದವಿಧರರು, ಶಿಕ್ಷಕರು ಕಾಂಗ್ರೆಸ್ ಪಕ್ಷದ ಅಭ್ಯರ್ಥಿಗೆ ಮೊದಲ ಪ್ರಾಶಸ್ತ್ಯದ ಮತ ನೀಡಬೇಕೆಂದು ಮನವಿ ಮಾಡಿದರು.
ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ಜಿ.ಚಂದ್ರಶೇಖರಗೌಡ ಮಾತನಾಡಿ,ಈ ಹಿಂದೆ ಕಾಂಗ್ರೆಸ್ ಪಕ್ಷದ ಪದವಿಧರರ ಹಾಗೂ ಶಿಕ್ಷಕರ ಕ್ಷೇತ್ರಗಳ ಚುನಾವಣೆಯನ್ನು ಅಷ್ಟೊಂದು ಗಂಭಿರವಾಗಿ ಪರಿಗಣಿಸುತ್ತಿರಲಿಲ್ಲ.ಆದರೆ ಮುಖ್ಯಮಂತ್ರಿಯಾಗಿರುವ ಡಿ.ಕೆ.ಶಿವ ಕುಮಾರ್ ಅವರ ಕೆಪಿಸಿಸಿ ಅಧ್ಯಕ್ಷರಾದ ನಂತರ ಪದವಿಧರರ ಕ್ಷೇತ್ರದ ಚುನಾವಣೆಗಳನ್ನು ಗಂಭೀರವಾಗಿ ಪರಿಗಣಿಸಿ, ಪಕ್ಷದ ಎಲ್ಲಾ ಮುಖಂಡರಿಗೂ ಜವಾಬ್ದಾರಿ ನೀಡಿ, ಪಕ್ಷದ ಅಭ್ಯರ್ಥಿಯ ಗೆಲ್ಲಿಸುವ ಜವಾಬ್ದಾರಿ ಕೊಟ್ಟಿದ್ದರು.ಇದರ ಫಲವಾಗಿ ಆಗ್ನೇಯ ಶಿಕ್ಷಕರ ಕ್ಷೇತ್ರದಿಂದ ಡಿ.ಟಿ.ಶ್ರೀನಿವಾಸ್ ಗೆಲುವು ಸಾಧಿಸಿ,ಇತಿಹಾಸ ನಿರ್ಮಿಸಿದ್ದಾರೆ. ಆಗ್ನೇಯ ಪದವಿಧರರ ಕ್ಷೇತ್ರದಲ್ಲಿಯೂ ಪಕ್ಷದ ಅಭ್ಯರ್ಥಿ ಶಶಿ ಹುಲಿಕುಂಟೆ ಮಠ್ ಗೆಲ್ಲುವುದು ಖಚಿತ. ಮತದಾರರು ಕ್ರಮ ಸಂಖ್ಯೆ 01ಕ್ಕೆ ಮೊದಲ ಪ್ರಾಶಸ್ತ್ಯದ ಮತಗಳನ್ನು ನೀಡಬೇಕೆಂದರು.
ಕಾಂಗ್ರೆಸ್ ಪಕ್ಷಕ್ಕೆ ಅಧಿಕೃತವಾಗಿ ಸೇರ್ಪಡೆಗೊಂಡ ಸರಕಾರಿ ನೌಕರರ ಸಂಘದ ಮಾಜಿ ಜಿಲ್ಲಾಧ್ಯಕ್ಷ ನರಸಿಂಹರಾಜು ಮಾತನಾಡಿ, ಕಾಂಗ್ರೆಸ್ ಪಕ್ಷ ಓರ್ವ ಸಾಮಾನ್ಯ ವ್ಯಕ್ತಿಯನ್ನು ಗುರುತಿಸಿ, ಅವರಿಗೆ ಟಿಕೇಟ್ ನೀಡುವ ಮೂಲಕ ಕಾರ್ಯಕರ್ತರಿಗೆ ಭವಿಷ್ಯವಿದೆ ಎಂಬುದನ್ನು ಸಾಭೀತು ಮಾಡಿದೆ.ಹಾಗಾಗಿಯೇ ಇಂದು ಅಧಿಕೃತವಾಗಿ ಪಕ್ಷಕ್ಕೆ ಮುಖಂಡರ ಸಮ್ಮುಖದಲ್ಲಿ ಸೇರ್ಪಡೆಗೊಂಡಿದ್ದೇನೆ.ಶಶಿ ಹುಲಿಕುಂಟೆ ಮಠ್ ಗೆಲುವಿಗೆ ಶ್ರಮಿಸುವುದಾಗಿ ತಿಳಿಸಿದರು.
ಆಗ್ನೇಯ ಪದವಿಧರರ ಕ್ಷೇತ್ರದ ಕಾಂಗ್ರೆಸ್ ಪಕ್ಷದ ಅಭ್ಯರ್ಥಿ ಶಶಿ ಹುಲಿಕುಂಟೆ ಮಠ್ ಮಾತನಾಡಿ,ಪಕ್ಷದ ನನಗೆ 9 ತಿಂಗಳ ಹಿಂದೆಯೇ ಅಭ್ಯರ್ಥಿಯಾಗಿ ಘೋಷಣೆ ಮಾಡಿದ ಹಿನ್ನೆಲೆಯಲ್ಲಿ ಇಡೀ ಕ್ಷೇತ್ರವನ್ನು ಎರಡು ಬಾರಿ ಪ್ರವಾಸ ಮಾಡಿ ಶೇ90ರಷ್ಟು ಮತದಾರರನ್ನು ನೇರವಾಗಿ ಭೇಟಿಯಾಗಿ ಮಾತನಾಡಿದ್ದೇನೆ.ನಾನು ರಾಜಕೀಯ ಅಧಿಕಾರಕ್ಕಾಗಿ ಕ್ಷೇತ್ರದಿಂದ ಸ್ಪರ್ಧೆ ಮಾಡಿಲ್ಲ. ಸೇವಾ ಮನೋಭಾವದಿಂದ ಸ್ಪರ್ಧೆ ಮಾಡಿದ್ದೇನೆ.ಯುವ ಕಾಂಗ್ರೆಸ್ ಅಧ್ಯಕ್ಷನಾಗಿ, ಎನ್.ಎಸ್.ಯುಐನ ರಾಜ್ಯ ಕಾರ್ಯದರ್ಶಿ ಯಾಗಿ ಕೆಲಸ ಮಾಡಿದ ನನ್ನನ್ನು ಗುರುತಿಸಿ ಪಕ್ಷ ಟಿಕೇಟ್ ನೀಡಿದೆ. ಪಕ್ಷದ ಎಲ್ಲಾ ಮುಖಂಡರು ನನ್ನ ಪರವಾಗಿ ಕೆಲಸ ಮಾಡುತ್ತಿದ್ದಾರೆ.ವ್ಯಾಪಾರಿ ನಾನಲ್ಲ ಎಂದರು.
ಪಕ್ಷ ರಾಜ್ಯದಲ್ಲಿ ನಿರುದ್ಯೋಗ ಹೋಗಲಾಡಿಸಲು 75 ಹುದ್ದೆಗಳಿಗೆ ನೋಟಿಪಿಕೇಷನ್ ಹೊರಡಿಸಿದೆ.ಅಲ್ಲದೆ ವಿವಿಧ ಕೈಗಾರಿಕಾ ವಲಯಗಳಲ್ಲಿ ಯುವಜನರು ಸ್ವಯಂ ಉದ್ಯೋಗಿಗಳಾಗಲು ಅವಕಾಶ ಕಲ್ಪಿಸಿದೆ.ಈ ಹಿಂದೆ ಈ ಕ್ಷೇತ್ರವನ್ನು ಪ್ರತಿನಿಧಿಸಿದ್ದ ಬಿಜೆಪಿ ಅಭ್ಯರ್ಥಿಗಳ ಸಾಧನೆ ಶೂನ್ಯ.ವಿಧಾನಪರಿಷತ್‍ಗೆ ಹೋಗಿರುವುದು ಕಡಿಮೆ, ಮಾತನಾಡಿರುವುದು ಅತಿ ವಿರಳ. ಇಂತಹ ಪಕ್ಷದವರನ್ನು ಗೆಲ್ಲಿಸುವುದು ವ್ಯರ್ಥ ಎಂದು ಮತದಾರರಿಗೆ ಅನ್ನಿಸಿದೆ.ಹಾಗಾಗಿ ಮತದಾರರು ನನ್ನ ಕೈ ಹಿಡಿಯಲಿದ್ದಾರೆ ಎಂಬ ವಿಶ್ವಾಸವಿದೆ ಎಂದು ಶಶಿ ಹುಲಿಕುಂಟೆ ಮಠ್ ತಿಳಿಸಿದರು.
ಸುದ್ದಿಗೋಷ್ಠಿಯಲ್ಲಿ ಪಕ್ಷದ ಮುಖಂಡರಾದ ಆರ್.ರಾಮಕೃಷ್ಣಪ್ಪ ಮಾತನಾಡಿದರು.ಮುಖಂಡರಾದ ಷಣ್ಮುಗಪ್ಪ, ಅನಿಲ್, ಸುರೇಶ್‍ರಾಜ್, ಪುಟ್ಟರಾಜು, ಇರ್ಫಾನ್ ಅಹಮದ್, ಪಂಡಿತ್ ನಾರಾಯಣಪ್ಪ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.