ತುಮಕೂರು: ಕನ್ನಡ ಸಾಂಸ್ಥಿಕ ಸಂಸ್ಥೆಯಾದ ಕನ್ನಡ ಸಾಹಿತ್ಯ ಪರಿಷತ್ ಅಧ್ಯಕ್ಷ ಸ್ಥಾನವನ್ನು ಅಧಿಕಾರವಾಗಿ ಸ್ವೀಕರಿಸುವ ಅಧಿಕಾರಿ ಬೇಡ, ಸೇವೆಯಾಗಿ ಸ್ವೀಕರಿಸುವ ಲೇಖಕ, ಕನ್ನಡಪರ ಹೋರಾಟಗಾರ, ಪ್ರಮಾಣಿಕ ವ್ಯಕ್ತಿ ಬೇಕು. ಅಧ್ಯಕ್ಷ ಸ್ಥಾನಕ್ಕೆ ಸಾಹಿತಿ, ಪತ್ರಕರ್ತ, ಹೋರಾಟಗಾರ, ನೈತಿಕ ಶುದ್ಧತೆ, ಪಾರದರ್ಶಕ ನಡೆಯ ಜಾಣಗೆರೆ ವೆಂಕಟರಾಮಯ್ಯನವರು ಸೂಕ್ತವಾದ ವ್ಯಕ್ತಿ. ಕನ್ನಡಿಗರವರು ಇವರನ್ನು ಬೆಂಬಲಿಸಬೇಕು ಎಂದು ಹಿರಿಯ ಸಾಹಿತಿ ಪ್ರೊ.ಎಸ್.ಜಿ. ಸಿದ್ಧರಾಮಯ್ಯ ಮನವಿ ಮಾಡಿದರು.
ಕನ್ನಡ ಸಾಹಿತ್ಯ ಪರಿಷತ್ತಿನ ಅಧ್ಯಕ್ಷ ಸ್ಥಾನದ ಚುನಾವಣೆ ಆಕಾಂಕ್ಷಿಯಾಗಿರುವ ಜಾಣಗೆರೆ ವೆಂಕಟರಾಮಯ್ಯ ಅವರನ್ನು ಬೆಂಬಲಿಸಿ ಸೋಮವಾರ ನಗರದಲ್ಲಿ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ಕನ್ನಡ, ಕನ್ನಡಿಗರು, ಕರ್ನಾಟಕದ ಸಾಕ್ಷಿಪ್ರಜ್ಞೆಯಂತಿರುವ ಕನ್ನಡ ಸಾಹಿತ್ಯ ಪರಿಷತ್ತಿನ ಚರಿತ್ರೆಯ ಅವಲೋಕನ ಮಾಡಿದಾಗ ಕಳೆದ ಹತ್ತು ವರ್ಷಗಳಿಂದ ಪರಿಷತ್ತಿನ ಮೂಲ ಉದ್ದೇಶ ವಿಫಲವಾಗಿದೆ. ಅದರ ಪುನರ್ ಸ್ಥಾಪನೆ ಆಗಬೇಕಾಗಿದೆ ಎಂದರು.
ಕನ್ನಡ, ಕನ್ನಡ ನಾಡಿನ ಅಸ್ಮಿತೆ ಕಾಪಾಡುವ ಆಶಯದಿಂದ 112 ವರ್ಷಗಳ ಹಿಂದೆ ಮೈಸೂರು ಅರಸರಾದ ನಾಲ್ವಡಿ ಕೃಷ್ಣರಾಜ ಒಡೆಯರ್ ಕನ್ನಡ ಸಾಹಿತ್ಯ ಪರಿಷತ್ ಸ್ಥಾಪಿಸಿದರು. ಆದರೆ ಅವರು ಯಾವತ್ತೂ ಪರಿಷತ್ ಅನ್ನು ಅರಮನೆಯ ವೇದಿಕೆಯನ್ನಾಗಿ ಮಾಡಿಕೊಳ್ಳಲಿಲ್ಲ. ಅನೇಕ ಹಿರಿಯರು ಪರಿಷತ್ ಅಧ್ಯಕ್ಷರಾಗಿ ಮೂಲ ಉದ್ದೇಶಕ್ಕೆ ಧಕ್ಕೆಯಾಗದಂತೆ ನಡೆದುಕೊಂಡು ಸಂಸ್ಥೆಯನ್ನು ಘನತೆಯಿಂದ ಕಟ್ಟಿಬೆಳೆಸಿದರು. ಆದರೆ ಈ ಹಿಂದಿನ ಅಧ್ಯಕ್ಷ ಮಹೇಶ್ ಜೋಷಿ ಅವರು ರಾಜಕೀಯ ಪಕ್ಷವೊಂದರ ಬೆಂಬಲದಿಂದ ಸರ್ವಾಧಿಕಾರಿ ಧೋರಣೆಯಿಂದ ಪರಿಷತ್ತಿನ ಸ್ವಾಯತತ್ತೆಗೆ ಧಕ್ಕೆ ತಂದರು, ಅಸಾಂಸ್ಕøತಿಕ ವಾತಾವರಣಕ್ಕೆ ದೂಡಿದರು. ಇಂತಹ ಸ್ಥಿತಿಯಲ್ಲಿ ಸಮಾನ ಮನಸ್ಕರೆಲ್ಲಾ ಸೇರಿ ಕನ್ನಡ ಸಾಹಿತ್ಯ ಪರಿಷತ್ ಉಳಿಸಲು ಸಂಕಲ್ಪದ ರೀತಿಯಲ್ಲಿ ಹೋರಾಟ ನಡೆಸಬೇಕಾಯಿತು. ಹೋರಾಟದ ಫಲವಾಗಿ ಮಹೇಶ್ ಜೋಷಿ ಅಧ್ಯಕ್ಷ ಸ್ಥಾನದಿಂದ ಅಮಾನತ್ತಾದರು ಎಂದರು.
ಸಾಹಿತ್ಯ ಪರಿಷತ್ ಕಚೇರಿ ಎದುರಿಗಿದ್ದ ಪಂಪನ ವಾಕ್ಯವಿದ್ದ ಕಮಾನನ್ನು ಅಧ್ಯಕ್ಷ ಜೋಷಿ ಕಿತ್ತುಹಾಕಿದರು. ಪರಿಷತ್ತು ಸಂಸ್ಥಾಪಕ ನಾಲ್ವಡಿ ಕೃಷ್ಣರಾಜ ಒಡೆಯರ್ ಅವರ ಪ್ರತಿಮೆಯನ್ನು ತೆರವುಗೊಳಿಸಿದ್ದರು. ಹೋರಾಟ ಮಾಡಿದ ನಂತರ ಪ್ರತಿಮೆಯನ್ನು ಮೆಟ್ಟಿಲ ಬಳಿ ಕಾವಲುಗಾರರ ರೀತಿ ನಿಲ್ಲಿಸಲಾಗಿದೆ. ಒಂದು ರಾಜಕೀಯ ಪಕ್ಷಕ್ಕೆ ಕಬ್ಜ ಮಾಡಿರುವ ಪರಿಷತ್ ಅನ್ನು ಮುಕ್ತಗೊಳಿಸಿ ಮೂಲ ಆಶಯಗಳನ್ನು ಮತ್ತೆ ಪ್ರತಿಷ್ಠಾಪಿಸಬೇಕಾಗಿದೆ. ಹೀಗಾಗಿ ಅಧ್ಯಕ್ಷ ಸ್ಥಾನಕ್ಕೆ ಅರ್ಹ ಅಭ್ಯರ್ಥಿಯಾಗಿ ಜಾಣಗೆರೆ ವೆಂಕಟರಾಮಯ್ಯ ಸಮಾನಮನಸ್ಕರು ಏಕಾಭಿಪ್ರಾಯವಾಗಿ ಜಾಣಗೆರೆ ಅವರನ್ನು ಆಯ್ಕೆ ಮಾಡಿದ್ದು, ಇವರಿಗೆ ಬೆಂಬಲ ನೀಡಬೇಕು ಎಂದು ಪ್ರೊ.ಎಸ್.ಜಿ. ಸಿದ್ಧರಾಮಯ್ಯ ವಿನಂತಿ ಮಾಡಿದರು.
ಪರಿಷತ್ ಅಧ್ಯಕ್ಷ ಸ್ಥಾನದ ಆಕಾಂಕ್ಷಿ ಜಾಣಗೆರೆ ವೆಂಕಟರಾಮಯ್ಯ ಮಾತನಾಡಿ, ಕನ್ನಡ ಸಾಹಿತ್ಯ ಪರಿಷತ್ನ ಶುದ್ಧೀಕರಣ ಆಗಬೇಕಾಗಿದೆ. ಪರಿಷತ್ ಘನತೆ ಕಾಪಾಡುವ ಆಶಯದ ಸಮಾನಮನಸ್ಕರು ತಮ್ಮನ್ನು ಆಯ್ಕೆ ಮಾಡಿದ್ದಾರೆ. ಇದೇ ಸಂಕಲ್ಪದಲ್ಲಿ ಪ್ರಣಾಳಿಕೆ ಸಿದ್ಧಪಡಿಸಿ ಎಲ್ಲಾ ಜಿಲ್ಲೆಗಳ ಪ್ರವಾಸ ಮಾಡಿ, ಸಭೆ ನಡೆಸಿ ಪ್ರಚಾರ ಮಾಡುತ್ತಿರುವುದಾಗಿ ಹೇಳಿದರು.
ತಾವು ಅಧ್ಯಕ್ಷರಾಗಿ ಆಯ್ಕೆಯಾದರೆ ಕೊಳೆತುನಾರುತ್ತಿರುವ ಪರಿಷತ್ ಅನ್ನು ಶುದ್ಧೀಕರಣ ಮಾಡಿ ಘನತೆ, ಗೌರವ ತಂದುಕೊಡಲಾಗುವುದು. ಸ್ಥಗಿತಗೊಂಡಿರುವ ಕನ್ನಡ-ಕನ್ನಡ ನಿಘಂಟು ಯೋಜನೆಗೆ ಮರುಚಾಲನೆ ನೀಡಲಾಗುವುದು. ನಿಂತುಹೋಗಿರುವ ಪರಿಷತ್ ಮುಖವಾಣಿ ‘ಕನ್ನಡ ನುಡಿ’ ಪತ್ರಿಕೆಯ ಪ್ರಕಟಣೆ ಆರಂಭಿಸುವುದು. ಯುವ ಸಮೂಹಕ್ಕೆ ವಿಶಿಷ್ಟ ಸಾಹಿತ್ಯ ಶಿಬಿರ, ಕಮ್ಮಟ, ವಿಚಾರ ಸಂಕಿರಣ ಏರ್ಪಡಿಸಲಾಗುವುದು. ಸಾಹಿತ್ಯ ಸಮ್ಮೇಳನಾಧ್ಯಕ್ಷರನ್ನು ಉತ್ಸವಮೂರ್ತಿಯಾಗಿಸದೆ ವರ್ಷವಿಡೀ ಅವರ ಕ್ರಿಯಾಶೀಲತೆಯನ್ನು ಬಳಸಿಕೊಳ್ಳುವುದು. ಗ್ರಾಮೀಣ ಹಾಗೂ ನಗರ ಪ್ರದಶೇದ ಕನ್ನಡ ಶಾಲೆಗಳನ್ನು ಉಳಿಸಿ, ಅಭಿವೃದ್ಧಿಪಡಿಸಲು ಸರ್ಕಾರಕ್ಕೆ ಒತ್ತಡ ತರುವ ಕಾರ್ಯ ಮಾಡಲಾಗುವುದು, ಮುಂತಾದ ನಾಡುನುಡಿ ಉಳಿಸಿ ಬೆಳೆಸುವ ಕಾರ್ಯಕ್ರಮಗಳನ್ನು ರೂಪಿಸಲಾಗಿದೆ ಎಂದು ಜಾಣಗೆರೆ ವೆಂಕಟರಾಮಯ್ಯ ಹೇಳಿದರು.
ಜಾಣಗೆರೆ ವೆಂಕಟರಾಮಯ್ಯ ಅವರು ಸಾಹಿತ್ಯ ಪರಿಷತ್ ಚುನಾವಣೆಯಲ್ಲಿ ಗೆದ್ದು ಅಧ್ಯಕ್ಷರಾಗಿ ಪರಿಷತ್ತಿನ ಆಶಯಗಳನ್ನು ಈಡೇರಿಸಲಿ ಎಂದು ಆಶಿಸಿ, ಮಂಡ್ಯದ ರಾಜಶೇಖರಯ್ಯ ಎಂಬುವವರು ಚುನಾವಣೆ ಖರ್ಚಿಗೆಂದು ಈ ಸಂದರ್ಭದಲ್ಲಿ 5 ಸಾವಿರ ರೂ. ದೇಣಿಗೆ ನೀಡಿ ಶುಭ ಕೋರಿದರು.
ಹಿರಿಯ ಸಾಹಿತಿಗಳಾದ ಪ್ರೊ. ಜಯಪ್ರಕಾಶಗೌಡ, ಡಾ. ಬಂಜಗೆರೆ ಜಯಪ್ರಕಾಶ್, ಬಾ.ಹ. ರಮಾಕುಮಾರಿ, ಎಂ.ಹೆಚ್. ನಾಗರಾಜು, ಹೋರಾಟಗಾರ ವೈ.ಕೆ. ಬಾಲಕೃಷ್ಣ ಮೊದಲಾದವರು ಜಾಣಗೆರೆ ವೆಂಕಟರಾಮಯ್ಯ ಅವರನ್ನು ಬೆಂಬಲಿಸಿ ಮಾತನಾಡಿದರು.